తెలుగు మీడియాకి ‘కరోనా వైరస్‌’ సెగ.. వేతనాల్లో కోత.!

కరోనా వైరస్‌ సెగ తెలుగు మీడియాకి గట్టిగానే తాకినట్లు కన్పిస్తోంది. ‘కాస్ట్‌ కంట్రోల్‌’ దిశగా దాదాపు అన్ని మీడియా సంస్థలూ ఇప్పటికే చర్యలు చేపట్టినట్లు తెలుస్తోంది. కొన్ని ప్రధాన మీడియా సంస్థల్లో ఇప్పటికే ‘వేతనాల కోత’ అమలు చేస్తుండడం గమనార్హం. ఓ ప్రముఖ మీడియా సంస్థ 20 శాతం వరకు వేతనాల్లో కోత విధించింది.

అయితే, వర్క్‌ ఫ్రమ్ హోమ్ చేస్తున్నవారికి ఈ వేతనాల్లో కోత ఎఫెక్ట్‌ పెద్దగా లేదన్న చర్చ జరుగుతోంది. అదే సమయంలో, వారికీ ముందు ముందు ‘కోత’ తప్పదని అంటున్నారు. కారణం, మీడియా సంస్థలకి ప్రకటనల ద్వారా వచ్చే రెవెన్యూ గణనీయంగా తగ్గిపోవడమే.

ఇదివరకటితో పోల్చితే, ప్రకటనల ఆదాయం గణనీయంగా తగ్గిపోయింది. అయితే, ఆంధ్రప్రదేశ్‌లో అధికార పార్టీకి చెందిన మీడియా సంస్థకీ, అలాగే తెలంగాణలో అధికార పార్టీకి చెందిన మీడియా సంస్థకీ ఈ సమస్య ప్రస్తుతానికి లేకపోవడం ఆశ్చర్యకరమైన విషయం. ఆయా సంస్థల్ని ఆదుకోవడానికి, అధికార పార్టీ నేతలే కాదు.. వివిధ వ్యాపార సంస్థలు కూడా ‘ప్రత్యేక ప్రకటనల’ రూపంలో ముందుకొస్తుండడం చర్చనీయాంశంగా మారుతోంది.

ఇదిలా వుంటే, లాక్‌డౌన్‌ ఎంత కాలం కొనసాగితే అంత కాలం మీడియా కూడా సంక్షోభాన్ని ఎదుర్కోక తప్పదు. ఇప్పటికే స్థానిక ఎడిషన్స్‌ (ట్యాబ్లాయిడ్స్‌) కన్పించడంలేదు. వాటి కోసం పనిచేసే సిబ్బందికి ‘రెస్ట్‌’ ఇచ్చేశాయట మీడియా సంస్థలు. గౌరవ వేతనంతో వారిని కొన్ని సంస్థలు కొనసాగిస్తుండగా, మరికొన్ని మీడియా సంస్థలు నిర్మొహమాటంగా ‘తలాక్‌’ చెప్పేశాయంటున్నారు.

ఇక, ఎలక్ట్రానిక్‌ మీడియా విషయానికొస్తే.. ఇక్కడా కరోనా సెగ తప్పడంలేదట. అయితే, కష్ట కాలంలో ప్రాణాలకు తెగించి బాధ్యతలు నిర్వహిస్తున్న తమపై ‘వేతనాల కోత’, ‘వేటు’ అంటూ యాజమాన్యాలు చర్యలు తీసుకోవడాన్ని జర్నలిస్టులు జీర్ణించుకోలేకపోతున్నారు. డెస్కుల్లో పనిచేసే సిబ్బందిని తగ్గించడం సహా మీడియా సంస్థలు, ‘ఖర్చును’ తగ్గించుకుంటోన్న తీరు చూస్తోంటే, ముందు ముందు మన మీడియా రంగంలో అనూహ్యమైన మార్పులు చోటు చేసుకోవడం ఖాయంగానే కన్పిస్తోంది.