చిరంజీవి కొత్త సినిమా వస్తుందంటే ఉండే ఆసక్తి అభిమానుల్లోనే కాదు.. ప్రేక్షకుల్లో కూడా ఎక్కువే. దశాబ్దాలు గడుస్తున్నా అదే క్రేజ్. హిట్, ఫ్లాపులతో సంబంధం లేకుండా ప్రజాదరణ ఆయన సొంతం. తొమ్మిదేళ్లు గ్యాప్ వచ్చినా మళ్లీ సినిమాలు చేస్తుంటే అదే అభిమానం.. అదే వెల్లువ. కమ్ బ్యాక్ తర్వాత ఆయన చేసిన సినిమాలు ఒక్కో సినిమా ఒక్కో డిఫరెంట్ కాన్సెప్ట్ తో చేసినవే. కథలు.. పాత్రల్లో షేడ్స్ కనిపించాల్సిందే. అలా చేసిన సినిమాలే వాల్తేరు వీరయ్య, భోళా శంకర్. మాస్, కాన్సెప్ట్స్ కి కమర్షియల్, సెంటిమెంట్ అంశాలు జోడించి సినిమాలు చేశారు చిరంజీవి. ఒకప్పుడు తనకు అగ్రతాంబూలం కట్టబెట్టిన మాస్ అంశాలనే హైలైట్ చేస్తూ తెరకెక్కించారు. ఓ సినిమాలో బ్రదర్ సెంటిమెంట్.. మరో సినిమాలో సిస్టర్ సెంటిమెంట్ తో తెరకెక్కించారు.
వాల్తేరు వీరయ్య..
వాల్తేరు వీరయ్య సినిమాలో చిరంజీవి నట విశ్వరూపం చూపించారనే మాట చిన్నదే. వింటేజ్ మెగాస్టార్ అనే పదానికి న్యాయం చేశారు చిరంజీవి. మాస్ మేకోవర్, డైలాగ్స్, యాక్షన్, డ్యాన్స్, ఫైట్స్, సెంటిమెంట్ అన్నీ సమపాళ్లలో ఉండేలా చూసుకున్నారు. సినిమాలో చిరంజీవిని చూసి ఫ్యాన్స్ పూనకాలతో ఊగిపోతే.. కామన్ ఆడియన్స్ చిరంజీవిని ఎంజాయ్ చేశారు. రవితేజతో సెంటిమెంట్ సన్నివేశాల్లో చిరంజీవి నటన అందరినీ ఆకట్టుకుంది. పాటలు, ఫైట్స్ లో ఒకప్పటి చిరంజీవి కనిపించడంతో మూవీ మరింత ఎంటర్ టైన్ చేసింది. దీంతో సినిమాకు లాంగ్ రన్ తోపాటు బాక్సాఫీస్ వద్ద కలెక్షన్ల కుంభవృష్టే కురిసింది. కొద్దిలో నాన్ ఆర్ఆర్ఆర్ ఇండస్ట్రీ హిట్ మిస్సైనా డబుల్ బ్లాక్ బస్టర్ హిట్ సాధించింది.
భోళా శంకర్..
భోళా శంకర్ ప్రస్తుతం ధియేటర్లలో నడుస్తున్న సినిమా. సిస్టర్ సెంటిమెంట్ ప్రధానంగా తెరకెక్కిన సినిమా. గ్యాంగ్ స్టర్ కథే అయినా ప్రధానంగా అన్నాచెల్లెళ్ల మధ్య కథ. స్క్రీన్ ప్లే, టేకింగ్, విసువలైజేషన్, నెరేషన్ పరంగా ఎక్కడా తక్కువ కాకుండా దర్శకుడు తనదైన శైలిలో తెరకెక్కించిన సినిమా. నేటి ఆధునిక పద్ధతులకు కాస్త దూరంగా ఉన్నా ఫ్యామిలీ ఆడియన్స్, ఫ్యాన్స్ ను మెప్పించిన సినిమా. సినిమాలో హైలైట్ అయిన విషయం “చిరంజీవి”. రీఎంట్రీ తర్వాత ఇంతటి చార్మింగ్ లుక్ ఇదేనని చెప్పాలి. ఫ్యాన్స్, ఆడియన్స్ చిరంజీవి డ్యాన్స్, ఫైట్స్ కు ఫిదా అయ్యారు. చెల్లెలి సెంటిమెంట్ సన్నివేశాల్లో చిరంజీవి నటన ఆకట్టుకుంటుంది. చిరంజీవి మేనరిజమ్స్, స్టయిల్, తెలంగాణ స్లాంగ్ డైలాగ్స్ ఆకట్టుకుంటాయి.