సైబర్ దాడికి డ్రాగన్ సన్నద్ధం?

భారత సరిహద్దుల్లో ఘర్షణలకు పాల్పడి మన సైనికుల్ని పొట్టనబెట్టుకుని, తాను కూడా చావుదెబ్బ తిన్న చైనా.. తాజాగా వ్యూహం మార్చినట్టు తెలుస్తోంది. ఈసారి సరిహద్దుల్లో కాకుండా ‘సాఫ్ట్’గా దొంగ దెబ్బ తీయడానికి సన్నద్ధమవుతోందని సమాచారం. భారతీయ కంపెనీలు లక్ష్యంగా సైబర్ దాడులకు పాల్పడాలని వ్యూహం రూపొందించుకుంటోందని సైబర్ నిఘా సంస్థలు వెల్లడించాయి. భారత్ లోని మీడియా సంస్థలతోపాటు టెలికాం కంపెనీలు, ఫార్మా కంపెనీలపై సైబర్ దాడులు చేయడానికి చైనా హ్యాకింగ్ కమ్యూనిటీ సన్నద్ధమవుతోందని గుర్తించాయి. స

రిహద్దుల్లో ఘర్షణలకు సంబంధించి భారత్ కు గుణపాఠం చెప్పాలంటూ చైనీస్ హ్యాకర్లు గత పది రోజులుగా మాట్లాడుకుంటున్నారని సైబర్ నిఘా సంస్థలు హెచ్చరించాయి. వారంతా మాండేరియన్ భాషలో సంప్రదింపులు జరిపారని పేర్కొన్నాయి. చైనా పీపుల్స్ లిబరేషన్ ఆర్మీ (పీఎల్ఏ) తో సంబంధాలు కలిగిన గోతిక్ పాండా, స్టోన్ పాండా వంటి హ్యాకర్ల గ్రూపులు భారత కంపెనీలపై దాడికి ప్రణాళిక రూపొందించుకుంటున్నాయని సైబర్ నిఘా సంస్థ సైఫర్మా వెల్లడించింది.

వారి లక్ష్యంగా పెట్టుకున్న మీడియా సంస్థల్లో టైమ్స్ ఆఫ్ ఇండియా, రిపబ్లిక్ టీవీ, ఎన్డీటీవీ, హిందుస్తాన్ టైమ్స్, ఎక్స్ టీవీ, ఆజ్ తక్, దైనిక్ జాగరన్ వంటివి ఉన్నాయని తెలిపింది. అలాగే జియోతోపాటు ఎమ్ఆర్ఎఫ్ టైర్స్, సన్ ఫార్మాస్యూటికల్స్, ఎయిర్ టెల్, సిప్లా, ఇంటెక్స్ టెక్నాలజీస్, మైక్రోమ్యాక్స్, బీఎస్ఎన్ఎల్, అపోలో టైర్స్, ఎల్ అండ్ టీకి కూడా ముప్పు పొంచి ఉందని వివరించింది.

వీటితోపాటు ప్రభుత్వ సైట్లపై కూడా దాడులు జరగొచ్చని పేర్కొంది. ముఖ్యంగా విదేశాంగ శాఖ, రక్షణ శాఖ, సమాచార ప్రసార శాఖలు చైనా హ్యాకర్ల లిస్టులో ఉన్నాయని హెచ్చరించింది. ఈ నేపథ్యంలో సైబర్ దాడులను ఎదుర్కొనేందుకు సన్నద్ధంగా ఉండాలని సూచించింది.