మత్స్యాల్లోనూ మహమ్మారి?

ఇందుగలడందు లేడనే సందేహంబు వలదు అనే రీతిలో కరోనా మహమ్మారి విజృంభిస్తోంది. తాజాగా ఆహార పదార్ధాల్లోనూ ఈ మహమ్మారి ఉందనే వార్తలు మరింత ఆందోళన కలిగిస్తున్నాయి. దిగుమతి చేసుకున్న ఆహార పదార్థాల్లో కరోనా వైరస్ ఉండటం చైనాలో కలకలం రేపింది.

భారత్ నుంచి దిగుమతి చేసుకున్న చేపల్లో ఈ వైరస్ ను గుర్తించినట్టు ప్రముఖ వార్తాసంస్థ వెల్లడించింది. ఐస్ లో నిల్వ చేసిన చేపలను పరీక్షించగా.. మూడు శాంపిళ్లలో వైరస్ ఉన్నట్టు అధికారులు నిర్దారించారని.. దీంతో సదరు కంపెనీ నుంచి దిగుమతులు నిలిపివేశారని పేర్కొంది.

నిజానికి ఆహార పదార్థాల ద్వారా కరోనా వైరస్ సోకుతుందా లేదా అనే విషయంలో ఇప్పటివరకు పూర్తిస్థాయి స్పష్టత లేదు. ప్రపంచ ఆరోగ్య సంస్థ కూడా దీనిపై కచ్చితమైన మార్గదర్శకాలు విడుదల చేయలేదు. కరోనా వైరస్ జీవించి ఉండాలంటే మరో జీవిపైనే అది ఆధారపడి ఉంటుందని.. మామూలు ఉపరితలాలు, ప్యాకేజ్డ్ ఫుడ్ పై ఎక్కువ సేపు ఉండదని గతంలో నిర్ధారించారు.

ఆహార పదార్థాల ద్వారా ఇది ఒకరి నుంచి మరొకరికి సోకుతుందనడానికి ఎలాంటి ఆధారాలూ లేవని పేర్కొన్నారు. ఈ తరుణంలో గడ్డ కట్టించిన చేపల్లో ఈ వైరస్ ఉందనే వార్త ఆందోళన కలిగిస్తోంది. ఇటీవల ఇండోనేషియాకు చెందిన కంపెనీ నుంచి దిగుమతి చేసుకున్న చేపల్లోనూ కరోనా వైరస్ గుర్తించినట్టు చైనా వెల్లడించింది.

అలాగే బ్రెజిల్, ఈక్వెడార్, రష్యా తదితర దేశాల నుంచి వచ్చిన ఆహార పదార్థాల్లోనూ ఈ వైరస్ జాడ ఉన్నట్టు పేర్కొంది. అయితే, దీనిపై పూర్తిస్థాయి పరిశోధనలు జరిపిన తర్వాత మాత్రమే ఈ విషయంలో నిర్ధారణకు రాగలమని పలువురు పరిశోధకులు పేర్కొంటున్నారు. గడ్డ కట్టించిన చేపల్లో ఉన్న వైరస్ ఎంతకాలం బతికి ఉంటుందనే విషయాన్ని పరిశోధించాల్సి ఉందని చెబుతున్నారు.