చంద్రబాబు పట్టుదలంతా సానుభూతి కోసమా?

ఉండవల్లిలో కరకట్టపై టీడీపీ అధినేత చంద్రబాబు ఉంటున్న నివాసం ప్రతి రోజూ వార్తల్లోకి వస్తూనే ఉంది. ముఖ్యంగా వైఎస్సార్ సీపీ అధినేత వైఎస్ జగన్ మోహన్ రెడ్డి అధికారంలోకి వచ్చిన తర్వాత అక్రమ కట్టడం పేరుతో ఆ భవంతిని కూల్చడానికి ముందుకెళ్తున్న సంగతి గురించి చదువుతూనే ఉన్నాం. నిబంధనలకు విరుద్ధంగా నిర్మించిన కట్టడాలను కూల్చివేసే అధికారం ఏ ప్రభుత్వానికైనా ఉంటుంది. ఇప్పుడు అదే పని జగన్ సర్కారు చేస్తోంది. కానీ ఈ అంశాన్ని కూడా రాజకీయంగా వినియోగించుకోవడానికి చంద్రబాబు యోచిస్తున్నారనే సంగతి అర్థమవుతోంది.

నిజానికి అది చంద్రబాబు సొంత ఇల్లు కాదు. పారిశ్రామికవేత్త లింగమనేని రమేష్ కు చెందిన ఆ భవనాన్ని ఆయన అద్దెకు తీసుకున్నారు. అది అక్రమ నిర్మాణం అయిన పక్షంలో చంద్రబాబు ఆ నివాసాన్ని ఖాళీ చేసి వెళ్లిపోవాలి. కానీ ఆయన అలా చేయడంలేదు. ఆ భవనాన్ని కూల్చివేయాలని సర్కారు.. ఎలా కూలుస్తుందో చూస్తానంటూ చంద్రబాబు మొండి పట్టు పట్టి కూర్చున్నారు. గత కొంతకాలంగా సాగుతున్న ఈ వ్యవహారం తాజాగా మరింత ముందుకెళ్లింది. ఎలాగైనా ఆ నిర్మాణాన్ని కూల్చివేయాలని సర్కారు పట్టుదలతో ఉన్నందున త్వరలోనే ఆ పని పూర్తి కావడం ఖాయమే.

అయితే, దానిని రాజకీయంగా వినియోగించుకోవాలనే ఉద్దేశంతోనే చంద్రబాబు ఇంకా ఆ అక్రమ నిర్మాణంలో కొనసాగుతున్నారనే ఆరోపణలు వినిపిస్తున్నాయి. తనకు జగన్ వేధిస్తున్నారని, నిలువ నీడ లేకుండా చేయాలనే ఉద్దేశంతోనే తాను ఉంటున్న నివాసాన్ని కూల్చివేశారంటూ ప్రజలకు చెప్పి సానుభూతి పొందాలన్నది బాబు యోచనగా చెబుతున్నారు.

కేంద్ర మాజీ మంత్రి, బీజేపీలో చేరిన టీడీపీ ఎంపీ సుజనా చౌదరి సైతం ఇదే అనుమానం వ్యక్తంచేశారు. తానైతే వెంటనే ఆ నివాసం ఖాళీ చేసేవాడిననన్నారు. ‘‘ఏదైనా ఒక ఇంట్లో అద్దెకు ఉంటే, అక్కడ నిబంధనల ప్రకారం ఏదైనా కట్టలేదని తెలిస్తే నేను అయితే అలాంటి ఇంట్లో ఉండను. కానీ వారు (చంద్రబాబు) ఉన్నారు. ఇప్పుడు ఖాళీ చేయాలి. దాని గురించి ఇంత చర్చ ఏంటి? ఆ ఇంటిని ప్రభుత్వం గనుక పడగొడితే సానుభూతి వస్తుందని చంద్రబాబు చూస్తున్నారు’’ అని సుజనా వ్యాఖ్యానించారు. మరి ఆయన ప్రయత్నాలు ఫలిస్తాయో లేదో చూడాలి.