‘గెటౌట్ చైనా’కు తొలి అడుగు పడింది

సరిహద్దుల్లో దాష్టీకానికి తెగబడి 20 మంది భారత సైనికులు ప్రాణాలను బలిగొన్న చైనాపై దేశవ్యాప్తంగా ఆగ్రహ జ్వాలలు వ్యక్తమవుతున్నాయి. డ్రాగన్ కంట్రీకి బుద్ధి చెప్పాలన్న డిమాండ్లు వెల్లువెత్తుతున్నాయి. సైనికపరంగానే కాకుండా ఆర్థికంగానూ ఆ దేశాన్ని దెబ్బ కొట్టాలని డిమాండ్లు వస్తున్నాయి. సరిహద్దుల్లో ఉద్రిక్త పరిస్థితులు నెలకొన్నప్పటికీ, యుద్ధానికి దిగే సాహసం చైనా కూడా చేయదు. కరోనా కారణంగా తనపై ప్రపంచవ్యాప్తంగా వస్తున్న విమర్శల నుంచి అంతర్జాతీయ సమాజం దృష్టి మరల్చడానికే ఇలాంటి కుతంత్రాలకు పాల్పడుతోందనే విశ్లేషణలూ వినిపిస్తున్నాయి.

కరోనా కారణంగా చైనా నుంచి పలు కంపెనీలు వెనక్కి వెళ్లిపోతుండటం.. అలాంటివి భారత్ వైపు చూస్తుండటంతో.. వాటిని ఇండియాలోకి రానివ్వకుండా చూసే ఉద్దేశం కూడా ఇందులో ఉండొచ్చని అంటున్నారు. దీంతో చైనాకు చెక్ చెప్పడానికి ప్రజలు కూడా సన్నద్ధమవుతున్నారు.

ఇప్పటికే ‘గెటౌట్ చైనా’ పేరుతో రూపొందించిన హ్యాష్ ట్యాగ్ ట్రెండింగ్ అవుతోంది. బుధవారం దేశంలోని పలు ప్రాంతాల్లో చైనా ఉత్పత్తులకు వ్యతిరేకంగా ప్రజలు గళం విప్పారు. దీంతో అఖిల భారత వర్తకుల సమాఖ్య (సీఏఐటీ) కూడా రంగంలోకి దిగింది. చైనాలో తయరయ్యే 500కి పైగా ఉత్పత్తులను బహిష్కరిస్తున్నట్టు ప్రకటించింది. దీనికి సంబంధించిన జాబితా విడుదల చేసింది.

ఇందులో బొమ్మలు, అపెరల్స్, టెక్స్ టైల్స్, హ్యాండ్ బ్యాగ్స్, కిచెల్ ఐటమ్స్, కాస్మొటెక్స్, లగేజ్ ఐటెమ్స్, ఎలక్ట్రానిక్స్, వాచీలు, స్టేషనరీ, ఆటో పార్ట్స్, జ్యూయలరీ వంటి ఉత్పత్తులున్నాయి. ఇవన్నీ భారత్ లో కూడా సులభంగా ఉత్పత్తి చేయొచ్చని, తద్వారా స్వదేశీ ఉత్పత్తులకు ప్రోత్సాహం కూడా కల్పించొచ్చని సీఏఐటీ పేర్కొంది. చైనా ఉత్పత్తులను బాయ్ కాట్ చేయాలని సీఏఐటీ నిర్ణయం తీసుకోవడంతో ‘గెటౌట్ చైనా’కు తొలి అడుగు పడినట్టయింది.