కరీంనగర్ జిల్లాలో మందుపాతర పేలుడు.. ఉలిక్కిపడ్డ ఉపాధి కూలీలు

ఉపాధి కూలీలంతా తమ పనుల్లో నిమగ్నమై ఉన్నారు. ఇంతలో ఓ భారీ పేలుడు శబ్దం వినిపించింది. హడలెత్తిపోయిన కూలీలు తలో దిక్కుకు పరుగు లంఘించుకున్నారు. తెలంగాణలోని కరీంనగర్ జిల్లాలో జరిగిన ఈ సంఘటన వివరాలివి..

జిల్లాలోని గన్నేరువరం మండలం చాకలివానిపల్లి గ్రామ శివారులో గురువారం జరిగింది ఈ సంఘటన. గ్రామంలోని ఓ వ్యవసాయ క్షేత్రంలో భరీ పేలుడు సంభవించింది. పేలుడు ధాటికి ఆ పక్కగా పని చేసుకుంటున్న ఉపాధి కూలీలు చెల్లాచెదురైపోయారు. అయితే.. ఆ వ్యవసాయ క్షేత్రంలో ఉన్న చెట్టు వద్ద ఓ సంచి పేలిందని తెలిసింది. సంచిలో మందుగుండు సామాగ్రి కనిపించడంతో ఓ స్థానికుడు నిప్పెపెట్టగా అది భారీ శబ్దంతో పేలిందని తెలుస్తోంది. ఈ ఘటనలో ఎవరికీ ఎటువంటి నష్టం జరగలేదు.

అయితే మరునాడు (శుక్రవారం) యధావిధిగా పనికి వచ్చిన కూలీలు గురువారం జరిగిన సంఘటనను గ్రామ పంచాయతీ కార్యదర్శి రాజేందర్‌ కు విషయం చెప్పారు. దీంతో ఆశ్చర్యం వ్యక్తం చేసిన రాజేందర్ స్థానిక పోలీసులకు సమాచారం అందించారు. దీంతో ఘటనాస్థలానికి చేరుకున్న పోలీసులు పేలుడు జరిగిన ప్రదేశాన్ని పరిశీలించారు. విచారణలో.. ఆ సంచిలో 90 జిలిటిన్ స్టిక్స్, 50 డిటోనేటర్స్ ఉండడం గ్రహించారు.

గ్రామంలోకి జిలిటెన్ స్టిక్స్, డిటోనేటర్స్ ఎలా వచ్చాయనే దానిపై పోలీసులు ఆరా తీస్తున్నారు. గ్రామంలోని వారే ఎవరైనా ఈ మందుగుండు సామాగ్రిని తీసుకొచ్చారా.. లేక ఎవరైనా కావాలని అక్కడ పెట్టారా అనే విషయంపై పోలీసులు ఆరా తీస్తున్నారు.