భాజ‌పాలో చేరిన క్రికెట‌ర్ గౌత‌మ్ గంభీర్

న్యూఢిల్లీ: మాజీ క్రికెటర్ గౌతమ్ గంభీర్ ఇక రాజ‌కీయాలతో బిజీ కానున్నాడు. గ‌త ఏడాది నుంచి అత‌డు భాజ‌పాలో చేర‌తాడ‌ని వ‌చ్చిన వార్త‌ల‌ను ఇప్పుడు గంభీర్ నిజం చేశాడు. తాజాగా దేశ రాజ‌ధాని దిల్లీలో అమిత్‌షా, కేంద్ర మంత్రులు అరుణ్ జైట్లీ, ర‌విశంక‌ర్ ప్ర‌సాద్ ఆధ్వ‌ర్యంలో పార్టీ కండువా క‌ప్పుకున్నాడు. గంభీర్‌ను దిల్లీలోని ఓ స్థానం నుంచి లోక్‌సభ అభ్యర్థిగా బరిలోకి దింపాలని భాజపా భావిస్తోంది.
పార్టీలో చేరిన అనంత‌రం గంభీర్ మాట్లాడుతూ… ‘ప్రధాని నరేంద్రమోదీ నాయకత్వం నచ్చి భాజపాలో చేరుతున్నానని, ఈ అవకాశం ఇచ్చినందుకు ఎంతో గౌరవంగా భావిస్తున్నా’ అని అన్నారు. 37 ఏళ్ల గంభీర్ గతేడాది డిసెంబర్‌లో క్రికెట్‌కు గుడ్ బై చెప్పాడు. 13 ఏళ్లు అంతర్జాతీయ క్రికెట్ ఆడిన గౌతీ.. టీమిండియా 2011 వరల్డ్‌కప్ సాధించడంలో కీలకపాత్ర పోషించాడు. టెస్టుల్లో 9, వన్డేల్లో 11 సెంచరీలు చేశాడు. ఈ మధ్యే పద్మశ్రీ అవార్డు కూడా అందుకున్నాడు.