ఏపీలో బీజేపీకి కేంద్ర మంత్రి కావలెను

తెలంగాణకు ఓ కేంద్ర మంత్రి పదవిని కేటాయించింది భారతీయ జనతా పార్టీ. మరి, ఆంధ్రప్రదేశ్‌ నుంచి ఆ స్థాయి నేత ఎవరూ లేరనుకుందేమో, ప్రస్తుతానికి ఆ అవకాశమైతే ఏపీలో ఎవరికీ దక్కలేదు. ఒక్క అసెంబ్లీ సీటుగానీ, ఒక్క పార్లమెంటు సీటుగానీ ఆంధ్రప్రదేశ్‌లో బీజేపీకి దక్కలేదంటే, అదంతా బీజేపీ స్వయంకృతాపరాధమే. ఆంధ్రప్రదేశ్‌ని అన్ని విధాలా ఉద్ధరించేశామని బీజేపీ ఎంత చెప్పుకున్నా, ప్రధాని నరేంద్ర మోడీ స్వయంగా వచ్చి బహిరంగ సభల్లో తమ ‘ఉద్ధరింపు’ గురించి ఏకరువు పెట్టినా రాష్ట్ర ప్రజానీకం విశ్వసించలేదు. చివరి నిమిషంలో కేంద్రం ప్రకటించిన రైల్వే జోన్‌, ఆంధ్రప్రదేశ్‌ ప్రజలకు ‘పుండు మీద కారం చల్లినట్లు’ చేసింది. వాల్టేర్‌ డివిజన్‌ని ముక్కలు చేసి, ఆ డివిజన్‌ ఉనికి లేకుండా విశాఖ కేంద్రంగా రైల్వే జోన్‌ అనేసరికి.. బీజేపీ మిగిలిన ఆ కాస్తో కూస్తో గౌరవం కూడా పోయింది ఆంధ్రప్రదేశ్‌ ప్రజలకి. ఆ ఫలితమే తాజా ఎన్నికల్లో బీజేపీకి జరిగిన ఘోర పరాభవం.

ఈ నేపథ్యంలోనే ఏపీ బీజేపీ నేతలెవరూ తమ అధిష్టానాన్ని పదవులపై గట్టిగా అడగలేని పరిస్థితి. బీజేపీ జాతీయ నాయకత్వం కూడా ఆంధ్రప్రదేశ్‌ని పూర్తిగా విస్మరించేసింది, ఈ రాష్ట్రంపై ఆశలు కూడా వదిలేసుకుంది. అయితే, రాజకీయ వర్గాల్లో ఓ ఆసక్తికరమైన గాసిప్‌ ప్రచారంలోకి రావడం సంచలనంగా మారింది. ఇది బీజేపీ జాతీయ నాయకత్వం నుంచి అందుతున్న ‘లీక్‌’గా కొందరు అభివర్నిస్తున్నారు. ఇంతకీ ఆ గాసిప్‌ సారాంశమేంటంటే, బీజేపీ ఆంధ్రప్రదేశ్‌లో ఓ బలమైన ‘కేంద్ర మంత్రి’ కోసం ఎదురుచూస్తోందట. దానర్థం, కేంద్ర మంత్రి స్థాయి వ్యక్తి బీజేపీకి కావాలని. బీజేపీని, ఆంధ్రప్రదేశ్‌లో కాస్తో కూస్తో బలంగా నిలబెట్టగల ‘పవర్‌’ కోసం ఎదురుచూస్తున్న బీజేపీ, ఆ స్థాయి వ్యక్తి దొరికితే, కేంద్ర మంత్రి పదవితో సత్కరించి, తద్వారా ఆంధ్రప్రదేశ్‌లో బీజేపీని బలోపేతం చేసుకోవాలని నరేంద్ర మోడీ – అమిత్‌ షా ద్వయం భావిస్తోందని సమాచారమ్‌.

గతంలో సీబీఐ మాజీ జేడీ లక్ష్మినారాయణతో ఉద్యోగానికి రాజీనామా చేయించింది బీజేపీయేనని ప్రచారం జరిగింది. ఆయనే బీజేపీ ముఖ్యమంత్రి అభ్యర్థి అని కూడా వార్తలొచ్చాయి. అయితే లక్ష్మినారాయణ చివరకు జనసేనలో చేరారు. ఆయన ఆ పార్టీ తరఫున లోక్‌సభకు పోటీ చేసి విశాఖ నుంచి పరాజయం పాలయ్యారు. ఆయన మీద మళ్ళీ బీజేపీ కన్నేసిందా? లేదంటే ఇంకెవరి రాకని అయినా ఆశిస్తోందా? అనేదానిపై స్పష్టత లేదు. కంభంపాటి హరిబాబు లాంటి సీనియర్‌ నేతలు బీజేపీలో వున్నా, వాళ్ళెవరికీ ప్రజా బలం లేని పరిస్థితి. అన్నిటికీ మించి విశ్వసనీయత వున్న నేతలే ఏపీలో బీజేపీకి లేరు. మరి, 2024 ఎన్నికల్ని లక్ష్యంగా బీజేపీ చేసుకోవాలనుకుంటే అప్పటికన్నా ఆ పార్టీని కాస్తో కూస్తో బలోపేతం చేయగల గట్టి వ్యక్తి ఆంధ్రప్రదేశ్‌లో బీజేపీకి దొరకాలి కదా!