అమరావతి రైతుల్ని నడిరోడ్డు మీద.. మోకాళ్ళపై నిలబెట్టిందెవరు.?

రైతు కోసం వేల కోట్లు.. లక్షల కోట్లు ఖర్చు చేసేస్తున్నాయి ప్రభుత్వాలు. కానీ, వ్యవసాయం లాభసాటిగా ఎందుకు మారడంలేదు.? అసలు రైతుల పట్ల ప్రభుత్వాలు చూపే ‘శ్రద్ధ’లో చిత్తశుద్ధి ఎంత.? ఈ ప్రశ్న చుట్టూ దశాబ్దాలుగా చర్చ జరుగుతూనే వుంది. ‘మేం అధికారంలోకి వస్తే రైతుల్ని ఉద్ధరించేస్తాం..’ అని చెప్పని ప్రభుత్వం వుండదు. కానీ, ప్రతి ప్రభుత్వంలోనూ రైతులు ఆత్మహత్యలు చేసుకునే పరిస్థితులు కన్పిస్తుంటాయి.

ఇక్కడ, అమరావతిలో రైతుది చిత్ర విచిత్రమైన దీనగాధ. చంద్రబాబు హయాంలో అమరావతి, ఆంధ్రప్రదేశ్‌కి రాజధాని అయ్యింది. రాజధాని కోసం భూములు కావాలని అప్పటి ప్రభుత్వం అడిగితే.. ప్రభుత్వం చూపిన ‘గ్రాఫిక్స్‌’ చూసి, రైతులు ప్రభుత్వానికి పెద్దయెత్తున భూముల్ని ఇచ్చారు. ఇది తెలిసిన కథే. ఆ రైతులు, ఇప్పుడు నడి రోడ్డు మీద మోకాళ్ళ మీద నిల్చుని.. న్యాయం కోసం పోరాడాల్సిన దుస్థితి దాపురించింది.

అమరావతి పరిధిలో కన్పించిన ఈ దృశ్యం ఇప్పుడు అందర్నీ కంటతడి పెట్టిస్తోంది. అలా రోడ్డు మీద మోకాళ్ళపై నిల్చున్న రైతుల్లో మహిళలు కూడా వున్నారు. ‘అబ్బే, వాళ్ళంతా పెయిడ్‌ ఆర్టిస్టులు..’ అని రాజకీయ నాయకులు ‘పిచ్చి కూతలు’ కూయొచ్చుగాక. రైతులు పెయిడ్‌ ఆర్టిస్టులయితే.. ప్రపంచమెలా వుంటుంది.? అసలు ప్రపంచానికి తిండి ఎలా దొరుకుతుంది.? ఈపాటి విజ్ఞత లేనోళ్ళు రాజకీయాల్లో వుండబట్టే.. రైతుల దుస్థితి ఇలా తగలడింది. అప్పుడు చంద్రబాబు, ఇప్పుడు వైఎస్‌ జగన్‌.. అంతే తేడా. రైతుల్ని ఇద్దరూ కలిసే నట్టేట్లో ముంచేశారు.

కేవలం చంద్రబాబు అడిగారని రైతులు భూముల్ని ఇచ్చేయలేదు.. ప్రతిపక్ష నేత కూడా అమరావతికి ‘జై’ అన్నాకనే రైతులు, ప్రభుత్వానికి భూములిచ్చేందుకు ముందుకొచ్చారు. ఇప్పుడేమో, ప్రభుత్వం మారింది గనుక.. ‘మా ఇష్టం’ అంటున్నారు ప్రస్తుత అధికార పార్టీ నేతలు. ‘మా ఇష్టం.. రాజధానిని మేమెక్కడైనా కట్టుకుంటాం..’ అంటున్నారు. అంతేనా, ‘ముఖ్యమంత్రి ఎక్కడుంటే అదే రాజధాని..’ అని కూడా అడ్డగోలు వ్యాఖ్యలు చేస్తున్నారు. ఇంతకన్నా దుర్మార్గం ఇంకేముంటుంది.? అమరావతి రైతులకి అన్యాయం జరిగిందన్నదాంట్లో ఎవరికీ ఎలాంటి సందేహాల్లేవు. ఆ అన్యాయం చేసింది కేవలం గతంలో పరిపాలించిన చంద్రబాబు అండ్‌ టీమ్ మాత్రమే కాదు.. ప్రస్తుతం అధికారంలో వున్న వైఎస్‌ జగన్‌ అండ్‌ టీమ్ కూడా.

పొద్దున్న లేస్తే రైతుల గురించి ఉపన్యాసాలు దంచేస్తున్నారు ప్రస్తుత ప్రభుత్వ పెద్దలు. ఏం, అమరావతి రైతులు ఈ పెద్దలకు కన్పించడంలేదా.? అమరావతి రైతులంటే ఎందుకింత నిర్లక్ష్యం.? ‘మీ సమస్యలేంటి.?’ అని ప్రశ్నించలేకపోతున్న ముఖ్యమంత్రి, పరిపాలనా వ్యవహారాల నిమిత్తం.. ఆ రాజధానిలోనే.. ఆ అమరావతి రైతులు కన్నీరు మున్నీరవుతున్న రోడ్ల మీద నుంచే సచివాలయానికి వెళుతన్నారాయె. రైతు పట్ల దయలేని ప్రభుత్వం.. అనడానికి ఇంతకన్నా నిదర్శనం ఇంకేం కావాలి.?