ఉప ఎన్నిక వస్తే, గంటా ఏ పార్టీ నుంచి పోటీ చేస్తారో.!

మాజీ మంత్రి, టీడీపీ ఎమ్మెల్యే గంటా శ్రీనివాసరావు, విశాఖ స్టీలు ప్లాంట్ ప్రైవేటీకరణను నిరసిస్తూ ఎమ్మెల్యే పదవికి రాజీనామా చేసిన విషయం విదితమే. గంటా తొలుత స్పీకర్ ఫార్మాట్‌లో కాకుండా నిరసన రూపంలో రాజీనామా చేశారు. రెండోసారి మాత్రం స్పీకర్ ఫార్మాట్‌లోనే రాజీనామా చేశారు. అయితే, గంటా రాజీనామాని స్పీకర్ తమ్మనేని సీతారాం ఆమోదించాల్సి వుంది.

గంటా రాజీనామాకి ఆమోదం లభిస్తుందా.? లేదా.? అన్న సంగతి పక్కన పెడితే, ఉప ఎన్నిక వస్తే గంటా శ్రీనివాసరావు ఏ పార్టీ నుంచి పోటీ చేస్తారు.? అన్న చర్చ రాష్ట్ర రాజకీయాల్లో జోరుగా సాగుతోంది. విశాఖ స్టీలు ప్లాంటు ప్రైవేటీకరణ నేపథ్యంలో తలెత్తిన ఉద్యమాన్ని పొలిటికల్‌గా క్యాష్ చేసుకునేందుకు, తద్వారా తన పొలిటికల్ ఇమేజ్ పెంచుకునేందుకు గంటా శ్రీనివారావు ఎమ్మెల్యే పదవికి రాజీనామా చేశారన్నది నిర్వవాదాంశం.

అయితే, ఈ వాదనను ఆయన కొట్టి పారేస్తున్నారు. విశాఖ వాసిగా, స్టీలు ప్లాంటు సెంటిమెంట్ తనకు బాగా తెలుసనీ, బాధ్యత గల పౌరుడిగా మాత్రమే తాను ఈ నిర్ణయం తీసుకోవాల్సి వచ్చిందనీ అంటున్నారు. మరోపక్క, గంటా శ్రీనివారావు వైసీపీలో చేరేందుకు ప్రయత్నిస్తున్నారనీ, ఇప్పటికే వైసీపీ అధిష్టానంతో ఆయన టచ్‌లోకి వెళ్ళారనీ, అయితే మంత్రి అవంతి శ్రీనివాసరావు ఆయనకు అడ్డుపుల్ల వేస్తున్నారనీ గుసగుసలు వినిపిస్తున్నాయి.

నిజానికి, చాలాకాలంగా ఇటు గంటా ప్రయత్నాలు, అటు అవంతి అడ్డుపుల్లలు అనే ఎపిసోడ్ నడుస్తూనే వుంది. బీజేపీ ఎటూ, గంటా శ్రీనివాసరావుని తమవైపుకు రానివ్వదు. జనసేన సంగతి సరే సరి. తెలుగుదేశం పార్టీలో గంటా కొనసాగలేని పరిస్థితి. ఇంతటి గందరగోళ పరిస్థితుల్లో గంటా శ్రీనివాసరావు రాజీనామా లేఖతో రాజకీయ వ్యూహాన్ని పక్కగా తెరపైకి తెచ్చారుగానీ, అది ఆయన్ని మరింతగా అయోమయంలో పడేసిందన్నది రాజకీయ విశ్లేషకుల అభిప్రాయంగా కనిపిస్తోంది.

‘మీ రాజీనామాతో, మీ పోరాటంతో విశాఖ స్టీలు ప్లాంటు ప్రైవేటీకరణ ఆగుతుందా.?’ అని ప్రశ్నిస్తే, ‘ఆగాలనే కోరుకుంటున్నాను.. అందరూ కలిసొస్తే తప్ప అది సాధ్యం కాదు..’ అని గంటా అసలు విషయాన్ని తేల్చేశారు. ఉద్యమానికి నాయకత్వం వహించడానికి కూడా ఆయన మొహమాటపడుతుండడం ఆయన ‘ఊగిసలాట రాజకీయాన్ని’ చెప్పకనే చెబుతోంది.