లోకేష్‌ గ్రామంలో టీడీపీ, భువనేశ్వరి గ్రామంలో వైకాపా గెలుపు

ఏపీ పంచాయితీ ఎన్నికలు రెండవ దశ ముగిశాయి. రెండవ దశలో కూడా వైకాపా ఆధిపత్యం కనబర్చింది. వైకాపా మెజార్టీ స్థానాల్లో గెలుపొందగా ఈసారి టీడీపీ కూడా పుంజుకున్నట్లు అనిపించింది. వైకాపా నాయకులు పెద్ద ఎత్తున మోహరించినా కూడా కొన్ని చోట్ల టీడీపీ విజయాన్ని అడ్డుకోలేక పోయారు. కృష్ణా జిల్లాలో తెలుగు దేశం పార్టీ గౌరవ ప్రధమైన విజయాలను దక్కించుకుంది. ఎన్టీఆర్‌ పుట్టిన ఊరు అయిన నిమ్మకూరు ను లోకేష్‌ దత్తత తీసుకుని చాలా కాలంగా అభివృద్ది చేస్తూ వస్తున్నారు. ఆ గ్రామంలో టీడీపీ విజయాన్ని సొంతం చేసుకుంది.

నిమ్మకూరు పక్కనే ఉండే కొమరవోలు ను చంద్రబాబు నాయుడు భార్య భువనేశ్వరి దత్తత తీసుకున్న విషయం తెల్సిందే. అక్కడ కూడా తెలుగు దేశం పార్టీ విజయాన్ని సొంతం చేసుకుంటుందని భావించారు. కాని వైకాపా అక్కడ 102 ఓట్ల స్వల్ప మెజార్టీతో గెలుపొందారు. భువనేశ్వరి పలు అభివృద్ది కార్యక్రమాలు అక్కడ చేసినా కూడా జనాలు పెద్దగా పట్టించుకున్నట్లుగా అనిపించలేదు. గత అసెంబ్లీ ఎన్నికల సమయంలో కూడా కొమరవోలులో టీడీపీకి తక్కువ ఓట్లు వచ్చాయి.