ప్రపంచాన్ని కమ్మేస్తున్న కరోనా సెకండ్ వేవ్.. నిమిషానికో మరణం

ప్రపంచాన్ని కరోనా మహమ్మారి మళ్లీ ఉక్కిరిబిక్కిరి చేస్తోంది. ఏడాది ప్రారంభంలో యూరప్ లోని ఫ్రాన్స్, ఇటలీ, స్పెయిన్ ను ఉక్కిరిబిక్కిరి చేసిన కరోనా మహమ్మారి తర్వాత కాస్త తగ్గింది. ఇప్పుడు సెకండ్ వేవ్ వార్తల నేపథ్యంలో మళ్లీ అదే దేశాల్లో విజృంభిస్తోంది. దీంతో ఫ్రాన్స్, స్పెయిన్, యూకే వంటి దేశాలు లాక్ డౌన్ కూడా విధించాయి. ఈ నేపథ్యంలో ఈయూ రీజనల్ డైరక్టర్ హాన్స్ క్లుగే చెప్తున్న లెక్కల ప్రకారం యూరప్ లో ప్రతి 17 సెకన్లకు ఒక కరోనా మరణం సంభవిస్తోంది.

లాక్ డౌన్ నిర్ణయం వల్ల గత వారం రోజుల్లో 10 శాతం కేసులు తగ్గాయి. యూరోపియన్ యూనియన్ లో గత వారం 29వేల కేసులు నమోదవగా.. మరణాలు 18శాతం పెరిగాయి. యూరోపియన్ యూనియన్ లో ఇప్పటివరకూ 15 మిలియన్లకు పైగా కేసులు నమోదవగా 3లక్షల 55వేల మంది మృతి చెందారు. ఈ లెక్కలు మళ్లీ ప్రతి ఒక్కరినీ గందరగోళంలో పడేస్తున్నాయి.

అమెరికాలో కూడా కరోనా వికృత రూపం దాలుస్తోంది. ప్రతి నిమిషానికో కరోనా మరణం సంభవిస్తోందని తెలుస్తోంది. ఇప్పటివరకూ 2లక్షల 50వేలకు పైగా మరణాలు సంభవించాయి. గత వారం క్రితం వరకూ రోజుకు దాదాపు 80వేల కేసులు నమోదవగా.. బుధవారం ఒక్కరోజే 1లక్ష 55వేలకు పైగా కేసులు నమోదు కావడం.. 1700 మంది మృతి చెందడం పరిస్థితి తీవ్రతకు అద్దం పడుతోంది.

ప్రస్తుతం అమెరికాలో 1కోటి 15లక్షల యాక్టివ్ కేసులు ఉన్నట్టు అధికారిక లెక్కలు చెప్తున్నాయి. ఇప్పుడు అక్కడ కొత్తగా నమోదయ్యే కేసులకు సరిపడా సదుపాయాలు ఆస్పత్రుల్లో లేకపోవడం మరింత ఆందోళన కలిగిస్తోంది. మార్చి నుంచి ఆగస్టు మధ్యలో కరోనా కేసుల ప్రభావం ఇటలీలో 17రెట్లు, ఆస్ట్రేలియాలో 5రెట్లు కేసులు పెరిగినట్టు అధికారిక లెక్కలు చెప్తున్నాయి. పలు అధ్యయనాల అనంతరం ఈ లెక్కవు వెల్లడయ్యాయి.

జపాన్ లో గురువారం ఒక్కరోజే 2179 కేసులు నమోదయ్యాయి. జపాన్ లో ఒక్కరోజులో అత్యధిక కేసుల రికార్డు ఇదే. ఆఫ్రికా ఖండంలో కేసుల సంఖ్య 20 లక్షలు దాటింది. మొత్తంగా 48వేల మంది మరణించారు. పాకిస్థాన్ లో కూడా గురువారం 2547 కేసులు నమోదయ్యాయి. గల్ఫ్ దేశాల్లో గత వారం నమోదైన కొత్త కేసుల్లో 60 శాతం ఇరాన్ లోనే నమోదయ్యాయి. ప్రపంచ ఆరోగ్య సంస్థ చెప్తున్న ఈ లెక్కలు ఆందోళన కలిగిస్తోందని చెప్పాలి.