కేంద్రం కీలక నిర్ణయం: భారత తయారీ రంగానికి ఊతం

కేంద్రంలోని నరేంద్ర మోదీ ప్రభుత్వం మరో కీలక నిర్ణయం తీసుకుంది. ఇటీవల ప్రవేశపెట్టిన ఆత్మనిర్భర భారత్ లో భాగంగా భారత తయారీ రంగానికి ఊతం ఇచ్చేలా మరో ముందడుగు వేసింది. రక్షణ శాఖకు అవసరమైన 101 పరికరాల దిగుమతులపై నిషేధం విధించింది. వాటిని స్వదేశంలోనే తయారు చేయించడం ద్వారా భారత రక్షణ పరిశ్రమకు చేయూతనివ్వాలని ఈ నిర్ణయం తీసుకుంది. ఫలితంగా వచ్చే ఆరేడేళ్లలో దాదాపు రూ.4 లక్షల కోట్ల విలువైన ఆర్డర్లు స్వదేశీ పరిశ్రమలకు రానున్నాయి. ఈ విషయాన్ని కేంద్ర రక్షణ మంత్రి రాజ్ నాథ్ సింగ్ ట్విట్టర్ ద్వారా వెల్లడించారు. భారత రక్షణ పరిశ్రమకు ఇది సువర్ణావకాశమని ఆయన పేర్కొన్నారు.

భారత రక్షణ దళ అవసరాలకు అనుగుణంగా తమ సొంత డిజైన్లు లేదా డీఆర్ డీఓ అభివృద్ధి చేసిన డిజైన్లను ఉపయోగించి ఆయా పరికరాలు రూపొందించాలని రాజ్ నాథ్ సూచించారు. వచ్చే ఆరేడేళ్లలో దాదాపు రూ.4 లక్షల కోట్ల విలువైన ఉత్పత్తులు అవసరమవుతాయని.. ఇందులో ఆర్మీ, ఎయిర్ ఫోర్స్ లకు రూ.1.30 లక్షల కోట్ల చొప్పున ఉత్పత్తులు అవసరం కాగా, నేవీకి రూ.1.40 లక్షల కోట్ల వస్తువులు, పరికరాలు అవసరమవుతాయని వివరించారు.

ప్రపంచంలో అత్యధికంగా ఆయుధాలు, సంబంధిత పరికరాలు దిగుమతి చేసుకునే దేశాల్లో భారత్ ఒకటి. ఈ నేపథ్యంలో వీటిని స్వదేశంలో తయారు చేయించడానికి ప్రాధాన్యత ఇవ్వాలని కేంద్రం ఎప్పటి నుంచో భావిస్తోంది. ఈ నేపథ్యంలో మేకిన్ ఇండియా నినాదంలో భాగంగా భారత్ నుంచి ఆయుధాల ఎగుమతులు క్రమంగా పెరిగాయి. 2016 నుంచి 2019 మధ్య కాలంలో రక్షణ ఉత్పత్తుల ఎగుమతులు ఏకంగా 700 శాతం మేర పెరగడం విశేషం.

అమెరికా, ఆస్ట్రేలియా, ఫ్రాన్స్, ఫిన్లాండ్, జర్మనీ, ఇజ్రాయెల్, దక్షిణాఫ్రికా సహా 42 దేశాలకు భారత్ రక్షణ ఉత్పత్తులను ఎగుమతి చేస్తోంది. ఆయా దేశాల నుంచి మిలటరీ హార్డ్ వేర్ కొనుగోలు చేసి, అనంతరం ఉత్పత్తులను ఎగుమతి చేస్తోంది. ఈ నేపథ్యంలో 101 ఉత్పత్తులపై నాలుగేళ్లపాటు నిషేధం విధించడం ద్వారా దేశీయంగా ఆయా పరిశ్రమలకు ఊతం ఇవ్వాలని నిర్ణయం తీసుకుంది. వీటిలో చిన్నచిన్న విడిభాగాలే కాకుండా అత్యాధునికమైన ఆర్టిలరీ గన్స్, అసాల్ట్ రైఫిల్స్, చిన్న యుద్ధ నౌకలు, సోనార్ సిస్టమ్, రవాణా విమానాలు, తేలికపాటి హెలికాప్టర్లు, రాడార్ల వంటివి ఉన్నాయి.