మరోసారి అల వైకుంఠపురములో Vs సరిలేరు నీకెవ్వరు? – ఈసారి పైచేయి ఎవరిదో!

ఈ ఏడాది సినిమాలకు చాలా కష్ట కాలం. అయితే టాలీవుడ్ కు 2020 మంచి ఆరంభాన్ని ఇచ్చిందనే చెప్పాలి. మధ్యలో కరోనా వైరస్ వల్ల థియేటర్లు మూసివేశారు కానీ లేదంటే పరిస్థితి ఎలా ఉండేదో. ఇక 2020 సంక్రాంతి టాలీవుడ్ కు బాగా కలిసొచ్చింది. ఈ సంక్రాంతి మహేష్ బాబు, అల్లు అర్జున్ ల మధ్య పోటీ రంజుగా సాగడంతో అటు సినీ ప్రియులకు, ఇటు సామాన్య ప్రజలకు మంచి కిక్కిచ్చింది. మహేష్ నటించిన సరిలేరు నీకెవ్వరు, అల్లు అర్జున్ సినిమా అల వైకుంఠపురములో.. రెండూ నువ్వా నేనా అన్నట్లు బాక్స్ ఆఫీస్ వద్ద తలపడటం భలేగా అనిపించింది. అయితే సరిలేరు నీకెవ్వరుపై చివరికి అల వైకుంఠపురములో చిత్రానిదే పైచేయి అయింది.

ఇక ఇప్పుడు మరోసారి ఈ రెండు సినిమాల మధ్య పోటీ నెలకొంది. ఈసారి బుల్లితెరపై. డైరెక్ట్ గా కాదు కానీ బుల్లితెర మీద పైచేయి ఎవరిదోనన్న ఆసక్తి అందరిలోనూ ఉంది. మార్చ్ లో సరిలేరు నీకెవ్వరు టివిలో ప్రీమియర్ అయింది. సినిమా విడుదలై రెండే నెలలు కావడంతో అందరూ ఆసక్తిగా ఆ చిత్రాన్ని తిలకించారు. సరిలేరు నీకెవ్వరు టిఆర్పిల పరంగా రికార్డును సృష్టించింది. ఇప్పటివరకూ ప్రీమియర్ అయిన అన్ని తెలుగు సినిమాల కంటే ఎక్కువగా 23.4 టిఆర్పిను సొంతంచేసుకుంది. మహేష్ కు ఫ్యామిలీ ఆడియన్స్ లో ఫ్యాన్ ఫాలోయింగ్ కు ఇది అద్దం పడుతుంది.

ఇక ఇప్పుడు ఆగష్టు 15న జెమినీ టివిలో సాయంత్రం 6.30 గంటలకు అల వైకుంఠపురములో చిత్రం కూడా టివిలో ప్రీమియర్ అవుతోంది. మరి సిల్వర్ స్క్రీన్ పై మురిపించిన ఈ చిత్రం, బుల్లితెరపై కూడా ఆకట్టుకోగలదా? మరోసారి సరిలేరు నీకెవ్వరు చిత్రాన్ని బీట్ చేయగలదా??