దారుణం: విచక్షణ మరచి వలస కూలీలపై పోలీసుల లాఠీఛార్జ్

లాక్ డౌన్ కారణంగా కనీసం ఫుడ్ కూడా దొరకకపోవడంతో వలస కూలీలు కాలినడకన, సైకిల్స్ పైన తన స్వస్థలాలకు చేరుకోవాలని పాదయాత్ర చేస్తున్న దృశ్యాలు మనం రోజూ చూస్తూనే ఉన్నాం. అందులో కొంతమంది యాక్సిడెంట్స్ కి గురయ్యి చనిపోతుంటే మరికొందరు ఆకలి బాధలకు చనిపోతున్నారు.

ఇన్ని కష్టాలను తట్టుకొని కన్యాకుమారి నుంచి బయలు దేరి ఎన్నో వ్యయప్రయాసలకు ఓర్చి వెళ్తున్న వలస కూలీలపై ఆంధ్రా పోలీసులు విచక్షణా రహితంగా లాఠీఛార్జ్ చేశారు. తాడేపల్లి గూడెం బ్రిడ్జ్ ప్రాంతంలోకి ఎంటర్ అవ్వగానే సుమారు 150 మంది కూలీలను పోలీసులు అడ్డుకున్నారు. అడ్డుకోవడమే కాకుండా వారిపై సిఐ స్థాయి అధికారి దారుణంగా లాఠీఛార్జ్ చేయడంతో వలస కూలీలు భయాందోళనలో పరుగులు తీశారు. ఈ ఘటనపై వారు వాగ్వాదానికి దిగారు.

కన్యాకుమారి నుంచి ఇన్ని వందల కిలోమీటర్లు నడుచుకుంటూ వచ్చాం.. ఎక్కడా ఏ చెక్ పోస్ట్ దగ్గరా ఆపలేదు. ఆంధ్రలోని నాలుగు జిల్లాల చెక్ పోస్టుల్లో కూడా ఆపలేదు కానీ ఇక్కడికి వచ్చే సరికి ఇలాంటి నిబంధనలు ఎలా వచ్చాయని వలస కూలీలు పోలీసులని ప్రశ్నించారు. కానీ వీటికి సమాధానం ఇవ్వని పోలీసులు ఆ 150 మందిని విజయవాడ క్లబ్‌ పునరావాస కేంద్రానికి తరలించారు. ఈ విషయంపై పలు విమర్శలు వెల్లువెత్తుతున్నాయి. ఇంత దారుణమైన సంఘటనపై రాష్ట్ర స్థాయి అధికారులు ఏమన్నా చర్యలు తీసుకుంటారా లేక మాకేం సంబంధం లేదన్నట్టు వ్యవహరితారో చూడాలి. గతంలో కూడా పలుసార్లు ఇదే చెక్ పోస్ట్ వద్ద ఇలాంటి లాఠీ ఛార్జ్ ఘటనలు పలు చోటు చేసుకున్నాయి.