కులాల కుంపటి.. ఏపీలో ‘సాహో’ని దెబ్బతీసిన ఆర్జీవీ.?

‘సాహో’ సినిమాని సరిగ్గా టైమ్‌ చూసి దెబ్బ కొట్టాడట సంచలన దర్శకుడు రామ్‌గోపాల్‌ వర్మ. ‘ప్రభాస్‌దీ.. నాదీ ఒకటే క్యాస్ట్‌..’ అంటూ సోషల్‌ మీడియా వేదికగా వర్మ చేసిన ప్రచారం ‘సాహో’ని ఉభయ గోదావరి జిల్లాల్లో దారుణంగా దెబ్బ తీసిందనే చర్చ అభిమానుల్లో చాలా చాలా గట్టిగా విన్పిస్తోంది.

ఎవరు ఔనన్నా ఎవరు కాదన్నా, ఆంధ్రప్రదేశ్‌లో కులాల మధ్య ఆధిపత్య పోరు సుస్పష్టం. రాజకీయ నాయకులే కాదు, సినీ హీరోలకీ కులాల వారీగా అభిమానులున్నారు.. ఈ పైత్యం ఉభయగోదావరి జిల్లాలతోపాటు, కృష్ణా జిల్లా.. అలాగే గుంటూరు జిల్లాలో ఎక్కువ. వర్మ తన సినిమా ‘కమ్మ రాజ్యంలో కడప రెడ్లు’ని ప్రమోట్‌ చేసేందుకు రూపొందించిన పాట, ఈ క్రమంలో ‘సాహో’ పేరుతో చేసిన పబ్లిసిటీ స్టంట్‌, ఉభయగోదావరి జిల్లాల్లో కలకలం సృష్టించిందని అంటున్నారు.

‘సాహో’ సినిమాకి ఫస్ట్‌ టాక్‌ బయటకు వచ్చిన దగ్గర్నుంచీ, సోషల్‌ మీడియాలో సినిమాకి వ్యతిరేకంగా దుష్ప్రచారం మొదలయ్యిందన్నది ప్రభాస్‌ అభిమానుల వాదన. నిజానికి, కొంతమంది అభిమానులు ఉభయగోదావరి జిల్లాల్లో ‘సామాజిక వర్గం’ కోణంలో ప్రభాస్‌ పేరుతో నానా యాగీ చేశారు.. అదీ ‘సాహో’ రిలీజ్‌కి ముందు. దీనికి కొందరు రాజకీయ నాయకుల మద్దతు కూడా లభించింది.

ఎప్పుడైతే, సినిమాకి నెగెటివ్‌ టాక్‌ వచ్చిందో.. ఆటోమేటిక్‌గా ప్రత్యర్థి వర్గం నుంచి కొందరైనా సెటైర్లు వేయడం షురూ చేస్తారు. అదే జరిగిందిక్కడ. ఆ మధ్య ప్రభాస్‌ అభిమానులకీ, మరో పెద్ద హీరో అభిమానులకీ మధ్య ఈ ‘కుల పంచాయితీ’ భీమవరంలో జరగడం చూశాం. అయితే, ఇప్పుడు సదరు పెద్ద హీరో అభిమానులు డైరెక్ట్‌గానే ‘సాహో’కి మద్దతు పలికారు. అయినాగానీ, రాజకీయ నాయకులు.. ప్రభాస్‌ అభిమానుల్నీ, ఆ పెద్ద హీరో అభిమానుల్నీ విడదీసేందుకు కపట రాజకీయాలు తెరపైకి తేవడంతో.. ఆ ఎఫెక్ట్‌ ‘సాహో’ మీద పడిందట.