‘చౌదరి’ కోవర్ట్‌ ఆపరేషన్‌.. బీజేపీకి డౌటొచ్చిందా!

తెలుగుదేశం పార్టీ అధినేత నారా చంద్రబాబునాయుడికి అత్యంత సన్నిహితుడైన సుజనా చౌదరి, భారతీయ జనతా పార్టీలో చేరడం వెనుక ‘కోవర్ట్‌’ ఆపరేషన్‌ వుందా.? అని మొదటి నుంచీ అనుమానాలు వ్యక్తమవుతూనే వున్నాయి. ఆ అనుమానాలు బలపడ్తున్నాయా.? ఏపీ బీజేపీ నేతలకి సుజనా చౌదరి మీద నమ్మకం లేదా.? తమ అధిష్టానానికి సుజనా చౌదరి వ్యవహార శైలిపై ఫిర్యాదు చేయబోతున్నారా? ఈ ప్రశ్నలకు ‘ఔను’ అనే సమాధానం వస్తోందిప్పుడు.

ఇటీవల సుజనా చౌదరి, ఆంధ్రప్రదేశ్‌లో పలువురు బీజేపీ నేతలతో సమావేశమయ్యారు. రాష్ట్రంలో బీజేపీని బలోపేతం చేసేందుకు తీసుకోవాల్సిన చర్యలపై మంతనాలు కూడా జరిపారు. అయితే, సుజనా చౌదరిని ఏపీలో బీజేపీ తరఫున పెద్ద నేతగా చూసేందుకు మాత్రం ఏపీ బీజేపీ నేతలు ఇష్టపడటంలేదట. ‘ఆయన పెద్ద కోవర్టు.. ఆయన్ని అంత తేలిగ్గా ఎలా నమ్మగలం.?’ అంటూ ఓ బీజేపీ ముఖ్య నేత ఆఫ్‌ ది రికార్డ్‌గా వ్యాఖ్యానిస్తున్నారట. ‘అధిష్టానానికి ఎప్పటికప్పుడు రాష్ట్రం నుంచి నివేదికలు వెళుతుంటాయి.

ఒకవేళ టీడీపీ పట్ల సానుభూతితో సుజనా చౌదరి బీజేపీలో కోవర్టు ఆపరేషన్‌ నిర్వహిస్తుండడమే నిజమైతే, అందుకు తగ్గ సమాచారం కూడా ఢిల్లీకి అందుతుంది’ అని సదరు బీజేపీ సీనియర్‌ నేత కుండబద్దలుగొట్టేశారట. తనను ఏపీ బీజేపీ నేతలు అస్సలేమాత్రం నమ్మడం లేదన్న విషయమై సుజనా చౌదరి కూడా కాస్త ఆందోళనగానే వున్నట్లు తెలుస్తోంది. ‘పార్టీలో నాకు దక్కాల్సిన గౌరవం దక్కడంలేదు మొర్రో..’ అంటూ ఢిల్లీ బీజేపీ నేతల వద్ద సుజనా చౌదరి తాజాగా మొరపెట్టుకున్నారని సమాచారమ్‌.

‘మీ సచ్ఛీలతను నిరూపించుకునే అవకాశం వచ్చినప్పుడు ఆ పని సమర్థవంతంగా చేస్తే.. ఆ తర్వాత మీపై ఎలాంటి నెగెటివ్‌ ప్రచారమూ జరగదు’ అంటూ ఏపీకి చెందిన బీజేపీ ఢిల్లీ స్థాయి నేత ఒకరు సుజనా చౌదరికి ఉచిత సలహా కూడా ఇచ్చారట. టీడీపీలో వున్నప్పుడు తాను ‘కింగు’లా వుండేవాడిననీ, ఇప్పుడు తన పరిస్థితి అగమ్యగోచరంగా తయారైందని సుజనా చౌదరి వాపోతున్నారంటూ ఆయన సన్నిహితులే మీడియాకి లీకులు పంపుతుండడం గమనార్హం.