ఉత్త ‘సలహా’కి వృధాగా ఖర్చవుతున్న ప్రజాధనం.!

‘మేం అస్సలు అవినీతికి తావులేని ప్రభుత్వాన్ని నడుపుతున్నాం. నేరుగా లబ్దిదారుల ఖాతాల్లోకే సంక్షేమ పథకాలకు సంబంధించిన సొమ్ములు వెళ్ళేలా చేస్తున్నాం..’ అంటోంది వైసీపీ సర్కారు.!
సరే.. అది నిజమే అనుకుందాం.! సలహాదారుల సంగతేంటి.? కుప్పలు తెప్పలుగా వైసీపీ సర్కారుకి సలహాదారులున్నారు. ఆ సలహాదారుల కోసం ప్రభుత్వం ఎంత సొమ్ములు ఖర్చు చేస్తోంది.? అసలు ఆ సలహాదారులు ప్రభుత్వానికి ఇస్తున్న సలహాలేంటి.? ఆ సలహాల వల్ల ప్రభుత్వానికి ఉపయోగమేంటి.?

సలహాదారుల వ్యవహారమొక్కటే కాదు, చాలా నామినేటెడ్ పోస్టులు.. వాటికి సంబంధించి ప్రోటోకాల్ కావొచ్చు, ఇతరత్రా వ్యవహారాలకు సంబంధించిన చెల్లింపులు కావొచ్చు.. ఇవన్నీ ప్రజాధనం నుంచి ఖర్చు చేస్తున్నవే కదా.. అన్నది చాలామంది డౌటానుమానం.

వాలంటీర్ వ్యవస్థనే తీసుకుంటే.. ‘మేం వైసీపీ కార్యకర్తలనే వాలంటీర్లుగా నియమించాం..’ అని మంత్రులు, ఎమ్మెల్యేలు, ఎంపీలు.. గర్వంగా చెప్పుకుంటున్నారు. వారికి అందుతున్న గౌరవ వేతనాలు.. ఆ కారణంగా ప్రభుత్వంపై పడుతున్న ఆర్థిక భారం.. వీటి లెక్కలకు ఎవరు బదులు చెబుతారు.

ప్రభుత్వంలో వున్నవారు కొన్ని విధానపరమైన నిర్ణయాలు తీసుకోవచ్చు. వాటిని ఎవరూ ప్రశ్నించకూడదంటే ఎలా.? అంతిమంగా ఇక్కడ ఖర్చవుతున్నదీ.. వృధాగా చేతులు మారుతున్నదీ ప్రజాధనం.

ఉన్నత న్యాయస్థానం సలహాదారుల వ్యవహారంపై సీరియస్ వ్యాఖ్యలు చేస్తోంది. కానీ, అధికార వైసీపీలో చలనం వుండటంలేదు. ఎందుకు వుంటుంది.? ప్రభుత్వ కార్యాలయాలకు పార్టీల రంగుల వ్యవహారంలో ఏం జరిగిందో చూశాం. ఎంత ప్రజాధనం వృధా అయ్యిందో చూశాం.

అధికారిక కార్యక్రమాల్లో రాజకీయ విమర్శలు.. అధికార పార్టీ ప్రచారం కోసం.. అధికార యంత్రాంగాన్ని వినియోగించడం.. అన్నట్టు తయారైంది పరిస్థితి. ‘సలహాదారులు గతంలోనూ వున్నారు.. ప్రభుత్వం తరఫున పబ్లిసిటీ గతంలోనూ జరిగింది..’ అంటే, ఆ గత ప్రభుత్వంలో ఇలాంటివి జరిగాయనే కదా.. టీడీపీని జనం ఇంటికి పంపించింది.?

ఏం సలహాలో ఏంటో.! ప్రతిసారీ న్యాయస్థానాల్లో ప్రభుత్వాలకి మొట్టికాయలే మొట్టికాయలు. న్యాయస్థానాల్లో కేసులు వాదించడానికి కూడా పెద్ద మొత్తంలో ఖర్చు చేయాల్సిన దుస్థితి. అదీ ప్రజాధనమే. అలాంటప్పుడు, ఉత్త సలహాలెందుకు.? ప్రజాధనం వృధా చేయడానికి కాకపోతే.!