ఆఫ్ట్రాల్ రోజా.! శతకోటి లింగాల్లో బోడి లింగం: రాయపాటి అరుణ

రోజా రెడ్డి అలియాస్ రోజా సెల్వమణి.. సినీ నటి మాత్రమే కాదు, వైఎస్సార్ కాంగ్రెస్ పార్టీ ఎమ్మెల్యే.. పైగా, ఆమె మంత్రి కూడా. కానీ, ‘ఆఫ్ట్రాల్ రోజా.. శతకోటి లింగాల్లో బోడి లింగం..’ అంటూ రోజాపై విమర్శల తూటాలు పేల్చేశారు జనసేన మహిళా నాయకురాలు రాయపాటి అరుణ.

గత కొంతకాలంగా జనసేన పార్టీలో మహిళా విభాగం తరఫున అత్యంత బలంగా వినిపిస్తోన్న వాయిస్ రాయపాటి అరుణదే. రాజకీయ ప్రత్యర్థులు జనసేన పార్టీ మీద చేసే విమర్శల్ని తిప్పి కొట్టడంలో, రాయపాటి అరుణ రూటే సెపరేటు. ఈ క్రమంలో ఆమె అధికార పార్టీ నుంచి కొన్ని బెదిరింపులు కూడా ఎదుర్కొంటున్నారు.

మొన్నీమధ్యనే రాయపాటి అరుణకు బెదిరింపులు వస్తే, జనసేన అధినేత పవన్ కళ్యాణ్ స్వయంగా స్పందించి, అధికార పార్టీకి వార్నింగ్ ఇవ్వడంతో, రాయపాటి అరుణకి క్షమాపణలు కూడా చెప్పారు వైసీపీ నేతలు. మాటల్లో స్పష్టత, విమర్శల్లో స్పష్టత.. అన్నిటికీ మించి ఎవరికి ఏ భాషలో చెబితే అర్థమవుతుందో ఆ భాషలో చెప్పడం రాయపాటి అరుణ ప్రత్యేకత.

హిందూపురం వైసీపీ ఎంపీ గోరంట్ల మాధవ్ నగ్న వీడియో కాల్ లీక్ వ్యవహారం పెను రాజకీయ దుమారానికి కారణమైన విషయం విదితమే. ఈ ఘటనకు సంబంధించి ఓ మహిళగా, గోరంట్ల మాధవ్ తీరుని ఖండించాల్సింది పోయి, ఆయన్ని సమర్థించారు మంత్రి రోజా. ఈ క్రమంలో ఆమె జనసేన మీద విమర్శలు చేస్తూ, ‘పిల్ల యెదవలు’ అంటూ నోరు జారేశారు.

దాంతో, రాయపాటి అరుణ స్పందించాల్సి వచ్చింది. ‘ఆఫ్ట్రాల్ రోజా..’ అనేశారు రాయపాటి అరుణ. ‘బోడి లింగం’ అని కూడా ఎద్దేవా చేశారు. ‘ఇంకోసారి పిల్ల యెదవలు అనే ముందు నీ బతుకేంటో ఆలోచించుకుంటే మంచిది..’ అని ఉచిత సలహా కూడా ఇచ్చారు రాయపాటి అరుణ. ‘లెగిస్తే, నోరు తెరిస్తే.. పవన్ కళ్యాణ్, జనసైనికులు, జనసేన పార్టీ.. ఈ మూడింటి మీద ఏడవడంతోనే సరిపోతోంది మీ బతుకులకి.. వున్న పదవుల్ని సంతోషంగా అనుభవించలేరు.. రాష్ట్రానికి మీ వల్ల జరిగిన ఉపయోగం ఏమీ లేదు.. పరమ చెత్త బ్యాచ్..’’ అంటూ రాయపాటి అరుణ వ్యాఖ్యానించారు.

‘టీడీపీలో వున్నప్పుడు వైఎస్సార్ మీదా, వైఎస్ జగన్ మీదా గబ్బు నోరేసుకుని గబ్బు గబ్బు మాటలు మాట్లాడిన నువ్వు.. మంత్రి పదవి ఇవ్వకపోతే మళ్ళీ అలా తిడతావేమోనని నీకు పదవి ఇచ్చారు తప్ప, నీ సమర్థతని చూసి కాదు..’ అంటూ ఎద్దేవా చేశారు రాయపాటి అరుణ.

మంత్రి రోజాని పట్టుకుని జనసేన మహిళానేత రాయపాటి అరుణ మరీ ఇలాగనేశారేంటబ్బా.? ఫాఫం రోజా.. కౌంటర్ ఎటాక్ ఇచ్చే పరిస్థితుల్లో వుంటారంటారా.?