పోలవరం ప్రాజెక్టు ప్రారంభోత్సవమట.. ఎక్కడ.? ఎలా.?

నిన్న సాయంత్రం నుంచీ సోషల్ మీడియాలో పోలవరం ప్రాజెక్టు గురించి విపరీతమైన చర్చ జరుగుతోంది. డిసెంబర్ 1న పోలవరం ప్రాజెక్టు ప్రారంభోత్సవమట.. మేం వెళుతున్నాం చూడటానికి.. మీరూ వస్తారా.? అంటూ మీమ్స్ హోరెత్తుతున్నాయి.

అసలు పోలవరం ప్రాజెక్టేమిటి.? పూర్తయిపోవడమేంటి.? అని జనం ముక్కున వేలేసుకుంటున్నారు. వాస్తవానికి పోలవరం ప్రాజెక్టుని 2018 చివరి నాటికే పూర్తి చేసేస్తామని అప్పటి ముఖ్యమంత్రి నారా చంద్రబాబునాయుడు సెలవిచ్చారు. కానీ, అది పూర్తి కాలేదు.

వైసీపీ అధికారంలోకి వచ్చాక, రికార్డు సమయంలో పోలవరం ప్రాజెక్టు పూర్తి చేయబోతున్నామంటూ రివర్స్ టెండరింగ్ గురించి చాలా గొప్పగా చెప్పుకున్నారు ప్రస్తుత ముఖ్యమంత్రి వైఎస్ జగన్ మోహన్ రెడ్డి. జూన్ వెళ్ళిపోయింది.. 2020 కాదిది.. 2021 డిసెంబర్ 1 నేడు. అయినా, పోలవరం ప్రాజెక్టు పూర్తి కాలేదు.

పోలవరం ప్రాజెక్టు కోసం ఆంధ్రప్రదేశ్ ప్రభుత్వం చేస్తున్న ఖర్చుని కేంద్రం నుంచి రప్పించుకోవడానికే నానా తంటాలూ పడాల్సి వస్తోంది. నిజానికి పోలవరం జాతీయ ప్రాజెక్టు. కేంద్రమే ఈ ప్రాజెక్టు పనుల్ని చూసుకోవాలి, అవసరమైన మేర నిధుల్ని ఇవ్వాలి కూడా.

ప్రాజెక్టు కోసం ఎంత ఖర్చయితే అంతా ఇవ్వాల్సిన కేంద్రం, ఇవ్వడంలేదు సరికదా.. ఎప్పటికప్పుడు సరికొత్త కొర్రీలు పెడుతోంది. కానీ, ప్రశ్నించే ధైర్యం అప్పట్లో అధికారంలో వున్న చంద్రబాబుకిగానీ, ఇప్పుడు అధికారంలో వున్న వైఎస్ జగన్ మోహన్ రెడ్డికిగానీ లేదాయె.

చంద్రబాబు చేతకానితనం వల్లే పోలవరం ప్రాజెక్టు ఆలస్యమయ్యిందని వైసీపీ విమర్శిస్తుంటుంది.. వైఎస్ జగన్ చేతకానితనమే పోలవరం ప్రాజెక్టుకి శాపమని చెబుతుంటుంది. రెండూ నిజమే.. ఈ రెండు పార్టీల వల్లనే పోలవరం ప్రాజెక్టుకి అతీ గతీ లేకుండా పోతోంది.

అప్పటి మంత్రి దేవినేని ఉమామహేశ్వరరావు, ఇప్పటి మంత్రి అనిల్ కుమార్ యాదవ్ పలు సందర్భాల్లో చట్ట సభల సాక్షిగా పోలవరం ప్రాజెక్టు విషయమై ప్రకటనలు చేస్తూ తమ తమ ముఖ్యమంత్రుల్ని కీర్తించిన వైనం సోషల్ మీడియాలో వైరల్ అవుతోంది. ఈ రెండు పార్టీల మధ్య 60-40 పొలిటికల్ మ్యాజిక్ గురించి చర్చ జరుగుతోంది.