సీరియల్ రేపిస్టుకు 897 ఏళ్ల జైలు

పలువురు మహిళలపై అత్యాచారం చేయడంతోపాటు వందలాది మంది మహిళలను లైంగికంగా వేధించిన ఓ వ్యక్తికి అమెరికా కోర్టు ఏకంగా 897 ఏళ్ల జైలుశిక్ష విధించింది. ఉత్తర కాలిఫోర్నియాకు చెందిన రాయ్ చార్లెస్ వాలర్ (60) అనే వ్యక్తి 1991 నుంచి 2016 మధ్య పలువురు మహిళలను లైంగికంగా వేధించాడు. అర్ధరాత్రి ఇళ్లలోకి చొరబడి మహిళలపై అత్యాచారం చేసేవాడు. ఇలా 9 మందిపై అత్యాచారం చేయగా.. వందలాది మంది మహిళలను లైంగికంగా వేధించాడు. ఈ క్రమంలో అతడిపై 50కి పైగా కేసులు నమోదయ్యాయి.

దీంతో 2018లో రాయ్ ను పోలీసులు అరెస్టు చేశారు. అప్పటినుంచి ఈ కేసుపై విచారణ సాగుతోంది. బాధిత మహిళలు కోర్టుకు వచ్చి సాక్ష్యం చెప్పారు. అతడు ఎంత క్రూరంగా వ్యవహరించిందీ విడమర్చి చెప్పారు. అయితే, రాయ్ మాత్రం తాను అమాయకుడినంటూ మొసలి కన్నీరు కార్చాడు. కానీ సాక్ష్యాలన్నీ అతడికి వ్యతిరేకంగా ఉండటంతో న్యాయమూర్తి రాయ్ కు రెండు జీవిత ఖైదులు విధించారు. తొలుత 459 ఏళ్లు, అనంతరం 438 ఏళ్లు కలిపి మొత్తం 897 ఏళ్ల జైలు శిక్ష అనుభవించాలని తీర్పు చెప్పారు.