డాక్టర్ పై చేయేస్తే.. పదేళ్లు లోపలే!

వైద్యో నారాయణో హరి అన్నారు. మన సమాజంలో ఒకప్పుడు వైద్యుల్ని దేవుడిలా చూశారు. కానీ ఇప్పుడు చిన్న చిన్న విషయాలకు సైతం డాక్టర్లపైనా, ఆస్పత్రులపైనా దాడులు పెరిగాయి. కొంతమంది కోపంతో అప్పటికప్పుడు దాడికి పాల్పడుతుంటే.. మరికొందరు ప్రణాళిక ప్రకారం డబ్బులు లాగాలనే ఉద్దేశంతో వైద్యులపై దాడి చేస్తున్నారు. దీంతో తమకు రక్షణ కల్పించాలంటూ పలుమార్లు వైద్యులు సర్కారుకు విన్నవించారు.

తాజాగా ఈ విషయంలో కేంద్రంలోని ఎన్డీఏ సర్కారు కీలక నిర్ణయం తీసుకునే దిశగా అడుగులు వేస్తోంది. వైద్యులపై దాడికి పాల్పడేవారిని కఠినంగా శిక్షించాలని యోచిస్తోంది. ఈ మేరకు ఓ ముసాయిదా బిల్లు రూపకల్పన చేస్తోంది. దాని ప్రకారం.. డాక్టర్లపై దాడి చేసినవారికి కనిష్టంగా మూడేళ్ల నుంచి గరిష్టంగా పదేళ్ల వరకు జైలు శిక్ష విధించే అవకాశం ఉంటుంది. దీంతోపాటుగా రూ.2 లక్షల నుంచి రూ.10 లక్షల వరకు జరిమానా కూడా విధించేలా క్లాజ్ పొందుపరచనున్నారు. ఆస్పత్రిపై దాడి చేసి నష్టం కలిగించినవారినీ ఉపేక్షించకూడదని యోచిస్తున్నారు. అలాంటివారికి ఆరు నెలల నుంచి ఐదేళ్ల వరకు జైలు శిక్ష విధించనున్నారు.

ఈ మేరకు బిల్లు రెడీ అవుతోందని సమాచారం. కేంద్రంలో రెండోసారి అధికారంలోకి వచ్చిన తర్వాత వేగంగా కీలక నిర్ణయాలు తీసుకుంటున్న సర్కారు.. వైద్యుల భద్రతనూ కూడా ప్రతిష్టాత్మకంగా తీసుకుందని, అందుకే ఈ ముసాయిదా బిల్లు తీసుకొస్తోందని బీజేపీ వర్గాలు చెబుతున్నాయి. అయితే, ఇటీవల తీసుకొచ్చిన నేషనల్ మెడికల్ కౌన్సిల్(ఎన్ఎంసీ) చట్టంపై దేశవ్యాప్తంగా నిరసనలు వెల్లువెత్తుతున్న తరుణంలోనే వైద్యులకు అనుకూలంగా ఉండే ఈ బిల్లు తీసుకొస్తున్నారనే అభిప్రాయాలు వ్యక్తమవుతున్నాయి.