సీబీఐ డ్రామా.! మరి, సీఐడీ సంగతేంటి.?

తాను చేస్తే సంసారం.. ఇంకెవడన్నా చేస్తే వ్యభిచారం.. అన్నాడట వెనకటికి ఒకడు.! ఆంధ్రప్రదేశ్‌లో వైసీపీ నేతలు చేస్తున్న వ్యాఖ్యలు ఇలాగే వున్నాయన్న చర్చ సోషల్ మీడియా వేదికగా జరుగుతోంది. ‘టీడీపీ హయాంలో చేసిందేగా మేం చేస్తున్నది.?’ అంటూ చాలా సందర్భాల్లో వైసీపీ చెప్పడం చూశాం. మరెందుకు, టీడీపీ చేసినవాటిని ప్రతిపక్షంలో వున్నప్పుడు తప్పు పట్టారట.?

సరే, ఆ సంగతి పక్కన పెడితే.. వైఎస్ వివేకానంద రెడ్డి హత్య కేసుకు సంబంధించి సీబీఐ విచారణను ఓ ‘డ్రామా’ అని అంటున్నారు వైసీపీ ముఖ్య నేత, ఆంధ్రప్రదేశ్ ప్రభుత్వ సలహాదారు సజ్జల రామకృష్ణా రెడ్డి. ఎంత మాట.? సీబీఐ విచారణని డ్రామాగా అభివర్ణించడమా.?

సీబీఐ అంటే, జాతీయ దర్యాప్తు సంస్థ. సరే, ఆ సంస్థ మీద దేశంలో అధికారంలో వున్న పార్టీల పెత్తనం గురించి, సర్వోన్నత న్యాయస్థానం ‘పంజరంలో చిలక’ అని అభివర్ణించడం.. అన్నది వేరే చర్చ. రాష్ట్ర స్థాయిలో సీఐడీ, ఏసీబీ వంటి దర్యాప్తు సంస్థల్ని రాష్ట్రంలోని అధికార పార్టీలు వాడే వాడకం గురించి కొత్తగా చెప్పాల్సిన పనిలేదు.

విపక్ష నేతల మీద సీఐడీ కేసులు పెడుతోంటే, అక్కడికేదో బ్రహ్మాండం బద్ధలైపోయినట్లే వైసీపీ నేతలు హంగామా చేస్తుంటారు. అమరావతి భూముల కుంభకోణమంటూ మాజీ మంత్రి నారాయణపై ఓ కేసు విచారణ దశలో వున్న సంగతి తెలిసిందే. సీఐడీ తనిఖీలు కూడా నారాయణ కుటుంబ సభ్యుల మీద జరుగుతున్నాయి.

ఇంకోపక్క, వైఎస్ వివేకానంద రెడ్డి హత్య కేసులో, వైసీపీ ఎంపీ అవినాష్ రెడ్డిని ఈ రోజు సీబీఐ విచారించింది. సీబీఐ విచారణ ఓ డ్రామా అయితే, నారాయణ విషయంలో సీఐడీ చేస్తున్న విచారణను ఏమనాలి.? అని నెటిజన్లు ప్రశ్నిస్తున్నారాయె. రాజకీయ నాయకులం గనుక, ఏం మాట్లాడినా చెల్లిపోతుందంటే కుదరదు మరి.!