రోడ్ ప్రమాదం కేసులో వైసీపీ ఎమ్మెల్యే కుమారుడు.!

కర్నూలు జిల్లా బనగానపల్లె వైసీపీ ఎమ్మెల్యే కాటసాని రామిరెడ్డి తనయుడు ఓ రోడ్ యాక్సిడెంట్ వివాదంలో చిక్కకున్నారు. రెండు రోజుల క్రితం మాదాపూర్ సైబర్ టవర్ సిగ్నల్ వద్ద ఓ బెంజ్ కారు అతి వేగంతో బైక్ పై వెళ్తున్న భార్యాభర్తలను ఢీ కొంది. అయితే.. ఆ సమయంలో కారు నడుపుతోంది ఎమ్మెల్యే రామిరెడ్డి తనయుడు ఓబుల్ రెడ్డి అని వార్తలు వచ్చాయి. దీనిపై ఎమ్మెల్యే స్పందించారు.

‘సైబర్ టవర్ వద్ద జరిగిన రోడ్డు ప్రమాదానికి నా కుమారుడు కాటసాని ఓబుల్ రెడ్డికి సంబంధం లేదు. ఆ యాక్సిడెంట్ చేసింది ఓబుల్ రెడ్డి స్నేహితుడు కౌశిక్. మా బెంజ్ కారును గ్యారేజ్ లో రిపేర్ కు ఇచ్చాం. అక్కడి నుంచి కౌశిక్ తీసుకున్నాడు. కారును మాకు తెచ్చివ్వకుండా మరో స్నేహితుడితో కలిసి పబ్ కు వెళ్లారు. తిరిగి వస్తూండగా వారే ఈ ప్రమాదానికి కారకులయ్యారు. నా కుమారుడు పాదయాత్ర సందర్భంగా బనగానపల్లెలోనే ఉన్నాడు. పబ్ లో గానీ.. రోడ్డు ప్రమాదం జరిగిన సమయంలో గానీ నా కుమారుడు ఉన్నట్టు తేలితే చర్యలు తీసుకోవచ్చు. అనవసరంగా నా కుమారుడి పేరు ఈ కేసులో తీసుకురావడం తగదు. ఈ కేసుతో తమకు ఎటువంటి సంబంధం లేదు’ అని అన్నారు.

ఓవర్ స్పీడ్ తో సిగ్నల్ జంప్ చేసి మరీ దంపతులు వెళ్తున్న బైక్ ను బలంగా ఢీకొట్టారు. ఈ ప్రమాదంలో గౌతమ్ దేవ్ అనే వ్యక్తి అక్కడికక్కడే మృతి చెందాడు. ఆయన భార్య శ్వేతకు తీవ్ర గాయాలయ్యాయి. దీంతో కారు నడుపుతున్న వ్యక్తి కాశీ విశ్వనాధ్ ను పోలీసులు అదుపులోకి తీసుకున్నారు. కారులోని మరో వ్యక్తి పరారీలో ఉన్నాడు. ప్రమాద సమయంలో వారు అధిక మోతాదులో మద్యం సేవించినట్టు తెలుస్తోంది.