వైఎస్ విజయమ్మ.. రెండు పార్టీలకీ గౌరవాధ్యక్షురాలే.!

‘వైఎస్ షర్మిల రాజకీయ ఆలోచనల్ని మేం వ్యతిరేకిస్తున్నాం.. అయితే, ఆమెను అడ్డుకునే ఆలోచన మాకు లేదు. తెలంగాణలో మా పార్టీని మేం వదులుకున్నాం. ఆమె రాజకీయం ఆమె ఇష్టం. వైఎస్సార్ కాంగ్రెస్ పార్టీ నుంచి ఆమెకు ఎలాంటి సహకారం వుండదు.. సోదరిగా షర్మిల పట్ల జగన్ ఎప్పుడూ సోదరభావంతోనే వుంటారు.. వారి మధ్య కుటుంబ పరంగా ఎలాంటి విభేదాలూ వుండవు..’ అంటూ వైసీపీ ముఖ్య నేత సజ్జల రామకృష్ణారెడ్డి కొద్ది రోజుల క్రితం వ్యాఖ్యానించారు.

వైసీపీ కే చెందిన మరో నేత అద్దేపల్లి శ్రీధర్ ఈ మధ్యనే ఓ చర్చా కార్యక్రమంలో మాట్లాడుతూ, ‘మా చెల్లి వస్తోంది.. కాస్కోండి..’ అంటూ వ్యాఖ్యానించారు. సో, ఇక్కడ మేటర్ క్లియర్. వైసీపీ సంపూర్ణ సహాయ సహకారాలు షర్మిలకు వున్నాయి. షర్మిల కోసమే తెలంగాణలో వైసీపీ జెండా పీకేసింది. కాదు కాదు, వైసీపీ తెలంగాణ బాధ్యతల్ని షర్మిలకు అప్పగించాలనుకున్న వైఎస్ జగన్, అత్యంత వ్యూహాత్మకంగా షర్మిలతో కొత్త పార్టీని తెలంగాణలో పెట్టించబోతున్నారు.

కానీ, ‘సాక్షి మాకు కవరేజ్ ఇవ్వదు..’ అంటూ షర్మిలతో నిష్టూరాలేయిస్తారు. రాజకీయం కోసం వైఎస్సార్ కుటుంబంలో విభేదాలున్నట్లు చూపించేదీ వాళ్ళే.. మేమంతా ఒక్కటే.. అనేదీ వాళ్ళే. వైసీపీ గౌరవాధ్యక్షరాలైన విజయమ్మ, షర్మిల వెంట నిన్న నిరాహార దీక్ష కార్యక్రమంలో కన్పించడమేంటి.? షర్మిల వైసీపీ గౌరవాధ్యక్షురాలిగానే కొనసాగుతున్నప్పుడు, ఆమె ఈ కార్యక్రమానికి హాజరుకావడంలో అర్థమే లేదు. తల్లిగా షర్మిలకు మద్దతివ్వాలనుకుంటే.. అది ఇంటివరకే పరిమితమవ్వాలి.. నిరసన వేదికల్లో కనిపించడమేంటి చెప్మా.? ఎవర్ని నమ్మించడానికి.? ఎవర్ని వెర్రి వెంగళప్పలని చేయడానికి ఈ కుటుంబ రాజకీయాలట.?

షర్మిల పార్టీకి సంబంధించిన ప్రతి వ్యూహమూ, వైసీపీ కేంద్ర కార్యాలయం నుంచే రచించబడ్తోందన్న వాదనల్ని అంత తేలిగ్గా కొట్టిపారేయలేం. షర్మిల వెనకాల కన్పిస్తున్న ప్రతి నాయకుడూ, గతంలో వైఎస్ జగన్ వెంట నడిచినవాళ్ళే. అక్కడ కుమారుడ్ని ముఖ్యమంత్రిగా చూసుకున్న విజయమ్మ, ఇక్కడ షర్మిలను ముఖ్యమంత్రిగా చూసుకోవాలనుకోవడాన్ని తప్పుపట్టలేంగానీ, ఈమాత్రందానికి రెండు పార్టీలెందుకట.?