ఇంకోసారి దత్త పుత్రుడంటూ చెలరేగిపోయారు.. మరోమారు ప్యాకేజీ స్టార్ అంటూ పైత్యం ప్రదర్శించారు.! ఔను, ఆంధ్రప్రదేశ్ ముఖ్యమంత్రి, వైఎస్సార్ కాంగ్రెస్ పార్టీ అధినేత వైఎస్ జగన్ మోహన్ రెడ్డి తన స్థాయిని దిగజార్చుకుని.. అభ్యంతరకర వ్యాఖ్యలు చేశారు. అదీ, అధికారికంగా ప్రభుత్వం తరఫున నిర్వహించిన బహిరంగ సభలో.!
కోట్లాది రూపాయల ప్రజాధనాన్ని వెచ్చించి మరీ ముఖ్యమంత్రి రాజకీయ అవసరాల కోసం ప్రభుత్వం బహిరంగ సభల్ని నిర్వహిస్తోందా.? అన్న అనుమానాలు కలుగుతున్నాయి ఇటీవలి కాలంలో.!
విషయమేమో, పేదలకు పక్కా ఇళ్ళు నిర్మించి ఇవ్వడం. అలా పేదలకు ఇళ్ళను నిర్మించి ఇచ్చే కార్యక్రమంలో ముఖ్యమంత్రి వైఎస్ జగన్ మోహన్ రెడ్డి మాట్లాడిన మాటలేంటో తెలుసా.? జనసేన అధినేత పవన్ కళ్యాణ్ ఇంట్లోని ‘ఇల్లాలు’ గురించి.
‘ఆయనకు హైద్రాబాద్‌లో శాశ్వత నివాసం వుంది.. కానీ, ఆ ఇంట్లో ఇల్లాలు మాత్రం, ప్రతి మూడు లేదా నాలుగేళ్ళకు మారిపోతుంటుంది..’ అంటూ ముఖ్యమంత్రి వైఎస్ జగన్ మోహన్ రెడ్డి దిగజారుడు వ్యాఖ్యలు చేశారు.
పవన్ కళ్యాణ్ వైవాహిక జీవితం గురించి అందరికీ తెలిసిందే. ఇందులో దాపరికం ఏమీ లేదు. అది ఆయన వ్యక్తిగత జీవితం.! వైసీపీలో ఎంతమంది నేతలకు ఒకటికి మించిన పెళ్ళిళ్ళు జరగలేదు.? అంతెందుకు, వైఎస్ జగన్ కుటుంబంలోనూ అలాంటి వ్యవహారాలున్నాయి.
అయినా, పవన్ కళ్యాణ్ పెళ్ళిళ్ళతో వైసీపీ అధినేత వైఎస్ జగన్ మోహన్ రెడ్డికి ఏంటి సంబంధం.? రాష్ట్ర ప్రజలకు ఆ పెళ్ళిళ్ళ వల్ల వచ్చిన నష్టమేంటి.? పదే పదే ఒకటే మాట.! కంటెంట్ లేనప్పుడే, వ్యవహారం ఇలా కంగాలీ అయిపోతుంటుంది.!
వైఎస్ జగన్ మోహన్ రెడ్డి బహిరంగ సభల్లో పదే పదే చీటీ చూసి చదువుతుంటారు. ఆ చీటీ ఎవరు రాసిస్తున్నారోగానీ, ముందు వాళ్ళని మార్చెయ్యాలి. లేదంటే, ‘ముఖ్యమంత్రి మానసిక స్థితి సరిగ్గా లేదు, ఆయనకు వైద్య చికిత్స అవసరం’ అని పవన్ కళ్యాణ్ చేసిన వ్యాఖ్యలే నిజమేమో.. అనుకోవాల్సి వస్తుందంటూ సోషల్ మీడియాలో సెటైర్లు పడుతున్నాయ్ జనసేన మద్దతుదారుల నుంచి.