వైఎస్‌ జగన్‌ ‘ఎగ్జిక్యూటివ్‌ క్యాపిటల్‌’ – గడ్కరీ ‘న్యూ క్యాపిటల్‌’.!

కేంద్ర మంత్రి నితిన్‌ గడ్కరీ, వర్చువల్‌గా విజయవాడ దుర్గగుడి ఫ్లై ఓవర్‌ని ప్రారంభించారు. ఈ కార్యక్రమంలో ఆంధ్రప్రదేశ్‌ ముఖ్యమంత్రి వైఎస్‌ జగన్‌ మోహన్‌రెడ్డి పాల్గొన్నారు. ఈ సందర్భంగా రాష్ట్రానికి సంబంధించిన పలు రోడ్డు ప్రాజెక్టులపై గడ్కరీకి విన్నవించుకున్నారు ఏపీ సీఎం వైఎస్‌ జగన్‌. పనిలో పనిగా, ‘విశాఖపట్నం ఎగ్జిక్యూటివ్‌ క్యాపిటల్‌’ అనే అంశాన్ని వైఎస్‌ జగన్‌ ప్రస్తావించారు.

అయితే, కేంద్ర మంత్రి నితిన్‌ గడ్కరీ మాత్రం ‘న్యూ క్యాపిటల్‌ అమరావతి’ అనే ప్రస్తావనని ఒక్కసారి కాదు, పలుమార్లు తీసుకొచ్చారు. ఇదిప్పుడు రాష్ట్ర రాజకీయాల్లో హాట్‌ టాపిక్‌గా మారింది. కేంద్రం, మూడు రాష్ట్రాల అంశంపై పెద్దగా ఆసక్తితో లేదనే విషయం తేటతెల్లమయిపోయిందన్నది ‘వన్‌ క్యాపిటల్‌ అమరావతి’ అని నినదిస్తోన్నవారి విశ్లేషణ.. గడ్కరీ మాటలపై. మరోపక్క, ‘గడ్కరీ వ్యాఖ్యల్ని మరీ అంత బూతద్దంలో చూడాల్సిన పనిలేదు.. దుర్గ గుడి ఫ్లై ఓవర్‌ విషయంలోనే ఆయన అలా అన్నారు.. అంతకు మించి ఆయన మాటల్లో మూడు రాజధానుల పట్ల వ్యతిరేకత లేదు.

అయితే, వైఎస్‌ జగన్‌ ప్రస్తావించిన ఎగ్జిక్యూటివ్‌ క్యాపిటల్‌ విషయమై గవర్నర్‌ కూడా సానుకూలంగా స్పందించి వుండాల్సింది..’ అని వైసీపీ మద్దతుదారులు చెబుతున్నారు. ఇదిలా వుంటే, విజయవాడకు సంబంధించి పలు ఫ్లై ఓవర్‌ ప్రాజెక్టుల తాలూకు క్రెడిట్‌ని కేంద్ర మంత్రి నితిన్‌ గడ్కరీ, విజయవాడ ఎంపీ కేశినేని నానికి కట్టబెట్టేశారు. కేశినేని నాని అనే పేరు ప్రస్తావించకపోయినా, విజయవాడ ఎంపీ అంటే ఆయనే కదా. ఉపరాష్ట్రపతి వెంకయ్యనాయుడి పేరుని ప్రత్యేకంగా ప్రస్తావించారు నితిన్‌ గడ్కరీ.

మిగతా విషయాల్ని పక్కన పెడితే.. ఐదేళ్ళపాటు ముక్కీ మూలిగీ అన్నట్లుగా సాగిన దుర్గ గుడి ఫ్లై ఓవర్‌ పనులు ఎట్టకేలకు పూర్తయి, ఈ ఫ్లై ఓవర్‌ వాహనదారులకు అందుబాటులోకి రావడం ఆహ్వానించదగ్గ పరిణామమే. విజయవాడకు సంబంధించి పలు కీలక ప్రాజెక్టులు ఇంకా వేగం పుంజుకోవాల్సి వుంది. ‘శాసన రాజధానిగా అమరావతి కొనసాగుతుంది’ అని వైఎస్‌ జగన్‌ ప్రభుత్వం చెబుతున్న దరిమిలా, అమరావతి పేరుని ఒకటికి పలుమార్లు వైఎస్‌ జగన్‌ కూడా ప్రస్తావించి వుంటే, ముఖ్యమంత్రిగా ఆయన గౌరవం మరింత పెరిగేదే.!