సంక్షేమమే వెన్నూ దన్నూ.. జగన్ సర్కారుకి అదే పెద్ద ప్లస్సు.!

ఏడాది క్రితం పరిస్థితి వేరు.. ఇప్పటి పరిస్థితి వేరు. ప్రస్తుతం వున్న పరిస్థితుల్లో అభివృద్ధి గురించి ఎవరైనా మాట్లాడితే అదో పెద్ద బూతు వ్యవహారంగా మారిపోతోంది. యావత్ ప్రపంచమే కరోనా సంక్షోభాన్ని ఎదుర్కొంటోంది. ఈ పరిస్థితుల్లో అప్పు చేయడం అనేది సర్వసాధారణంగా మారిపోయింది ప్రభుత్వాలకి. ఎక్కడ ఎంత అప్పు దొరికితే, అంత అప్పూ చేసెయ్యడం తప్ప ఇంకో మార్గం లేదు. అలా చేసిన అప్పుల్ని ఏదో ఒక రూపంలో ప్రజలకు అందజేయడం కొంతవరకు సమంజసమే. ముందు ముందు ఆ అప్పులు రాష్ట్రాలకీ, దేశాలకీ శాపంగా మారతాయా.? లేదా.? అన్నది వేరే చర్చ.

భవిష్యత్తు గురించి ఆలోచించే పరిస్థితి ఇప్పుడు సామాన్యుల్లో కనిపించడంలేదు. ఎందుకంటే, ఎప్పుడు ఎవరి ప్రాణం కరోనా కారణంగా ఎలా పోతుందో చెప్పలేని పరిస్థితి. వైద్య ఆరోగ్య రంగం మీద ఎంత ఖర్చు చేస్తున్నా.. ఫలితాలు కనిపించడంలేదు. గతం తాలూకు వైఫల్యాలు ఇప్పుడు స్పష్టంగా కనిపిస్తున్నాయి. ఇప్పటి వైఫల్యాలు భవిష్యత్తుని అత్యంత భయానకంగా మార్చేయబోతున్నాయి. ముందే చెప్పుకున్నాం కదా.. భవిష్యత్తు గురించి ఆలోచించే పరిస్థితి లేదని.

తప్పో ఒప్పో.. రాష్ట్రంలో మెజార్టీ ప్రజలకు సంక్షేమ పథకాలు అందుతున్నాయి. కరోనా లాక్ డౌన్.. కర్ఫ్యూ.. ఈ కారణంగా ప్రజలకు ఇళ్ళకే పరిమితమవ్వాల్సి వస్తోంది. నేరుగా ప్రజల వద్దకే సంక్షేమ పథకాలు వెళ్ళిపోవడంతో గుడ్డిలో మెల్ల.. అన్న చందాన, సంక్షేమ పథకాలు ప్రజలకు కూడు పెడ్తున్నాయన్నది నిర్వివాదాంశం. విపక్షాలు అభివృద్ధి విషయమై ఎంత గగ్గోలు పెట్టినా ప్రస్తుతం ప్రయోజనం లేదు.

ప్రజలెవరూ అలాంటివాటి గురించి ఆలోచించడంలేదు. కరోనా మహమ్మారి పూర్తిగా తగ్గుముఖం పట్టేదాకా ఇదే దుస్థితి. తెలంగాణ ముఖ్యమంత్రి కేసీఆర్ హెలికాప్టర్ మనీ.. అని పేరు పెట్టినా, సంక్షేమం పేరుతో ఆంధ్రపదేశ్ వంటి రాష్ట్రాలు లబ్దిదారులకు ఇబ్బడిముబ్బడిగా నగదు అందిస్తున్నా.. జనంలోకి డబ్బు నేరుగా వెళ్ళడం ఇప్పుడున్న పరిస్థితుల్లో అత్యవసరమే.