మూడు పెళ్ళిళ్ళపై వక్రీకరణ.! వైఎస్ జగన్ మార్కు దుష్ప్రచారం.!

‘మనం మూడు రాజధానుల వల్ల అభివృద్ధి జరుగుతుందని చెబుతున్నాం.. వాళ్ళేమో మూడు పెళ్ళిళ్ళతో మేలు అని అంటున్నారు..’ అంటూ ఎవరో రాసిచ్చిన స్క్రిప్టుని ముఖ్యమంత్రి వైఎస్ జగన్ మోహన్ రెడ్డి అస్సలేమాత్రం తడుముకోకుండా చదివేశారు.

‘ఇది కదా మాస్ ర్యాగింగ్ అంటే..’ అంటూ సహజంగానే వైసీపీ అభిమానులు ఎలివేషన్స్ ఇస్తున్నారు. అవనిగడ్డలో ఓ అధికారిక కార్యక్రమం సందర్భంగా నిర్వహించిన బహిరంగ సభలో ముఖ్యమంత్రి వైఎస్ జగన్ మోహన్ రెడ్డి షరామామూలుగానే తెలుగుదేశం పార్టీపైనా, టీడీపీ అనుకూల మీడియాపైనా, పనిలో పనిగా ‘దత్త పుత్రుడు’పైనా విమర్శలు చేసేశారు.

అసలు పవన్ కళ్యాణ్ మూడు పెళ్ళిళ్ళ గురించి మాట్లాడిందేంటి.? అని వైఎస్ జగన్ కనీసం వాటి గురించి తెలుసుకున్నారా.? తెలుసుకోరు.. అదే అసలు సమస్య. ‘ప్రతిసారీ నా పెళ్ళిళ్ళ గురించే మాట్లాడతారు.. మీకెందుకు అంత అక్కసు.. కావాలంటే మీరూ చేసుకోండి..’ అని మాత్రమే పవన్ కళ్యాణ్ ఎద్దేవా చేశారు. ఇది సెటైరు.! ప్చ్, ఆ మాత్రం అర్థమైతే అది వైసీపీ ఎందుకు అవుతుంది.?

వచ్చిన సమస్యే అది.! అధినేత వైఎస్ జగన్ మోహన్ రెడ్డికి వైసీపీ నేతలు సరైన సమాచారం ఇవ్వరు. ఆయన అస్సలు తెలుసుకోవాలనుకోరు. స్క్రిప్టు చదివేస్తుంటారంతే.! సరే, వైసీపీ చెబుతున్న మూడు రాజధానులతోనే అభివృద్ధి జరుగుతుందనుకుందాం. అందులో ఒకటి అమరావతి కదా.? ఆ అమరావతిని వైసీపీ మంత్రులు ఎందుకు స్మశానం అంటున్నారు.? ఆ ఒక్కదాన్ని కూడా కట్టే ఉద్దేశ్యం లేకనే, మూడో పాట పాడుతున్నారు ముఖ్యమంత్రి వైఎస్ జగన్.

లేదంటే, అమరావతిలో అభివృద్ధి పనులు కొనసాగిస్తూనే, మిగతా రెండు రాజధానుల్లో రాజధాని పేరు పెట్టకుండా అభివృద్ధి పనులు మొదలు పెట్టివుండేవారు.. కోర్టు వివాదాలు రాకుండా. ప్చ్.. ఆ మాత్రం ఇంగితం వుంటే, అదసలు వైఎస్సార్ కాంగ్రెస్ పార్టీ ఎందుకు అయి వుండేది.?

అన్నట్టు, పవన్ కళ్యాణ్ చెప్పు చూపించడం వల్ల ముఖ్యమంత్రి వైఎస్ జగన్ మోహన్ రెడ్డికి తీవ్ర ఆవేదన కలిగినట్లుంది. ‘చెప్పు చూపించే రాజకీయ నాయకులు అవసరమా.?’ అని ప్రజల్ని ఉద్దేశించి ప్రశ్నించేశారు వైఎస్ జగన్. తనపై అవాకులు చెవాకులు పేలుతున్నవారిని ఉద్దేశించి కదా పవన్ కళ్యాణ్ చెప్పు చూపించింది.? ఆయనేమీ వైసీపీ ఎంపీలాగా నగ్నంగా వీడియో కాల్ చేసి అడ్డంగా బుక్కయిపోలేదు కదా.? వైసీపీ ఎమ్మెల్సీలాగా తనదగ్గర పనిచేసిన కారు డ్రైవర్‌ని చంపేయలేదు కదా.?

తల్లుల గురించీ, చెల్లెళ్ళ గురించీ ప్రస్తావించారు ముఖ్యమంత్రి వైఎస్ జగన్.! వైఎస్ జగన్ తల్లి, వైసీపీ మాజీ ఎమ్మెల్యే విజయమ్మ ఇప్పుడెక్కడున్నారు.? వైసీపీ గౌరవాధ్యక్షురాలి పదవికి ఆమె ఎందుకు రాజీనామా చేశారు.? వైఎస్ జగన్ చెల్లెలు షర్మిల ఎందుకు తెలంగాణకు వెళ్ళిపోయారు.? వైఎస్ జగన్ సొంత చెల్లెలు కాకపోయినా, బాబాయ్ కుమార్తె సునీతారెడ్డి, ‘వైఎస్ జగన్ ప్రభుత్వం నాకు న్యాయం చేస్తుందన్న నమ్మకం లేదు’ అంటూ వైఎస్ వివేకానందరెడ్డి హత్య కేసులో సుప్రీంకోర్టును ఎందుకు ఆశ్రయించారు.?

జనం ఇవేవీ ఆలోచించనంత అమాయకులని వైఎస్ జగన్ అనుకుంటే ఎలా.?