శునకంతో సావాసం.. పదిలంగా హృదయం

మనుషుల పట్ల అత్యంత విశ్వాసం కలిగిన జంతువు ఏది అంటే.. కుక్క అని ఠక్కున చెబుతాం. కొత్తగా దీని ఖాతాలోకి మరో ఘనత చేరింది. శునకాలతో సావాసం చేస్తే మన గుండె పదిలంగా ఉంటుందని తేలింది. కుక్కలను పెంచుకోవడం వల్ల గుండె సంబంధిత రుగ్మతలు వచ్చే అవకాశాలు చాలా తక్కువతని తాజా పరిశోధనలో వెల్లడైంది. ఇంట్లో కుక్కను పెంచుకోవడం వల్ల దాని ఆలనా పాలనా చూసే క్రమంలో మనకు తెలియకుండానే వ్యాయామం చేస్తామని.. తద్వారా గుండె జబ్బులకు దూరంగా ఉండొచ్చని పరిశోధకులు వెల్లడించారు.

దాంతోపాటు పరిగెత్తడం లేదా నడవడం, కుక్కను తీసుకుని పార్క్ కి వెళ్లడం వంటి అంశాలు మనకు ఎంతో మేలు చేస్తాయని చెబుతున్నారు. ‘‘చురుకైన జీవనశైలి, మంచి ఆహారం, క్రమం తప్పకుండా చేసే వ్యాయామంతో గుండె పదికాలాల పాటు పదిలంగా ఉంటుందన్న సంగతి మనకు తెలిసిందే. మన ఇంట్లో కుక్కను పెంచుకోవడం వల్ల దాంతోపాటే మనం కూడా వ్యాయామం చేస్తాం. ఇది మన గుండెను భద్రంగా ఉంచుతుంది’’ అని ఈ పరిశోధనలో పాలుపంచుకున్నా ఆండ్రియా తెలిపారు.

పెంపుడు జంతువులు మన ఆరోగ్యంపై ఎలాంటి ప్రభావం చూపిస్తాయో తెలుసుకునేందుకు చెక్ రిపబ్లిక్ లోని బ్రొనో నగరానికి చెందిన పరిశోధకులు ఇటీవల ఓ అధ్యయనం నిర్వహించారు. 24 ఏళ్ల నుంచి 64 ఏళ్ల వయసున్న 1769 మందిపై పరిశోధన జరిపారు. వీరిలో 42 శాతం మందికి పెంపుడు జంతువులు ఉన్నాయి. వీరిలో 24 శాతం మంది కుక్కను పెంచుకుంటుండగా.. మిగిలిన 18 శాతం మంది ఇతర జంతువులను కలిగి ఉన్నారు. తొలుత వీరందరి ఆరోగ్య వివరాలు నమోదు చేసుకున్నారు. కొంతకాలం తర్వాత మరోసారి అవే వివరాలను సేకరించారు.

రెండింటికీ మధ్య తేడాలను గుర్తించగా.. ఆశ్చర్యకరమైన విషయాలు వెల్లడయ్యాయి. కుక్క సహా పెంపుడు జంతువులతో కాలక్షేపం చేసేవారిలో ఇతరుల కంటే రక్తపోటు, మధుమేహం, కొవ్వు శాతం తక్కువగా ఉండి గుండె ఆరోగ్యం మెరుగ్గా ఉన్నట్టు తేలింది. పెంపుడు జంతువులు లేని వారితో పోలిస్తే వీరికి మంచి కొలెస్ర్టాల్‌ అధికంగా ఉండటంతో పాటు మధుమేహం లేకపోవడాన్ని గుర్తించారు. పైగా ఇతర జంతువులు కలిగి ఉన్నవారికంటే శునకాలను పెంచుకునేవారిలో గుండె సంబంధిత రుగ్మతలు అస్సలు కనిపించకపోవడాన్ని కనుగొన్నారు. దీంతో శునకాలను పెంచుకోవడం గుండెకు మంచిదని నిర్ధారణకు వచ్చారు.