సినీ నటుడు, జనసేన అధినేత పవన్ కళ్యాణ్ కోసం మంగళగిరి జనసేన పార్టీ కార్యాలయానికి వెళ్ళారు పలువురు నిర్మాతలు. దర్శకుడు హరీష్ శంకర్ కూడా వారి వెంట వున్నారు.
జనసేన పార్టీ కార్యాలయంలో కొత్త భవన నిర్మాణానికి సంబంధించి భూమి పూజ, అదే సమయంలో యజ్ఞ యాగాదులు కూడా ‘వారాహి’ యాత్రకు సంబంధించి జనసేనాని నిర్వహించారు.
దైవకార్యం గనుక, దైవ దర్శనం కోసం ఆయా సినీ ప్రముఖులు మంగళగిరి జనసేన కార్యాలయానికి వచ్చారు. ఈ సందర్భంగా, జనసేన అధినేత పవన్ కళ్యాణ్‌తో ప్రత్యేకంగా భేటీ అయ్యారు. వారాహి వాహనాన్ని పరిశీలించారు.
ఆయా నిర్మాణ సంస్థలు, జనసేన అధినేతకు అంతా మంచే జరగాలని ఆకాంక్షిస్తూ తమ తమ అధికారిక సోషల్ మీడియా హ్యాండిల్స్ ద్వారా వారాహి యాత్రకు విషెస్ అందించాయి.
కాగా, మంగళగిరి జనసేన పార్టీ కార్యాలయాన్ని సందర్శించిన అనంతరం దర్శకుడు హరీష్ శంకర్ మాట్లాడుతూ, పవన్ కళ్యాణ్ ఇకపై ఎక్కువగా ఆంధ్రప్రదేశ్‌లోనే వుండబోతున్నారనీ, ఈ నేపథ్యంలో సినిమా షూటింగులు కూడా విజయవాడ పరిసర ప్రాంతాల్లోనే జరుగుతాయని చెప్పారు.
తాను దర్శకత్వం వహిస్తోన్న ‘ఉస్తాద్ భగత్ సింగ్’ సినిమాతోపాటు, ‘ఓజీ’ తదితర సినిమాలు కూడా విజయవాడ పరిసర ప్రాంతాల్లోనే షూటింగులు జరుపుకుంటాయని హరీష్ శంకర్ చెప్పడం గమనార్హం.
పవన్ కళ్యాణ్ సినిమాలే కాదనీ, ఇతర హీరోల సినిమాలు కూడా ఇకపై విజయవాడ పరిసర ప్రాంతాల్లోనూ షూటింగులు జరిపేందుకు నిర్మాతలు ముందుకొస్తున్నట్లుగా చెప్పారాయన.
ఇదిలా వుంటే, ఇంతలా నిర్మాతల నుంచి జనసేన అధినేతకు సహకారం లభించడం పట్ల సర్వత్రా హర్షం వ్యక్తమవుతోంద.ి మెగాస్టార్ చిరంజీవి ప్రజారాజ్యం పార్టీతో రాజకీయాల్లోకి వచ్చినప్పుడు, ఆయనకు సినీ పరిశ్రమ నుంచి తగిన సహకారం లభించలేదు. కానీ, పవన్ కళ్యాణ్‌కి తగిన సహకారం అందుతున్నట్లే కనిపిస్తోంది. ప్రముఖ నిర్మాత బీవీఎస్ఎన్ ప్రసాద్ నిన్న జనసేన పార్టీలో చేరిన సంగతి తెలిసిందే.
మరికొందరు సినీ ప్రముఖులు కూడా జనసేన పార్టీలో చేరేందుకు సిద్ధంగా వున్నట్లు ప్రచారం జరుగుతోంది. ‘వారాహి యాత్ర’ ప్రారంభమైతే, ఆ యాత్రలో పలువురు సినీ ప్రముఖులు స్వయంగా పాల్గొనే అవకాశం వుంది. జనసేనానికి సంఘీభావం తెలిపేందుకు కొందరు, జనసేన పార్టీలో చేరేందుకు కొందరు సినీ ప్రముఖులు సిద్ధమవుతున్నారట.
తెలుగు సినీ పరిశ్రమకు ఆంధ్రప్రదేశ్‌లోని వైసీపీ సర్కారు నుంచి ఎదురవుతున్న ఇబ్బందుల నేపథ్యంలో, పరిశ్రమ తరఫున తొలుత బలంగా గళం వినిపించింది పవన్ కళ్యాణ్ అని ప్రత్యేకంగా చెప్పాల్సిన పనిలేదు కదా.! ఆ పవన్ కళ్యాణ్‌కి అండగా నిలబడటం సినీ పరిశ్రమ బాధ్యత కూడా.!