సంయమనం కోల్పోతున్న రాజుగారు.. అసలు కథేంటి.?

వైసీపీ ఎంపీ రఘురామకృష్ణరాజు, సొంత పార్టీకి పక్కలో బల్లెంలా తయారయ్యారు. ఆయన్ని పార్టీ వదిలించుకోవట్లేదు.. ఆయన పార్టీని వదలట్లేదు. రఘురామకృష్ణరాజుకి వున్న ‘పదవి’ పోగొట్టడానికి మాత్రమే వైసీపీ అధిష్టానం ప్రయత్నిస్తోంది. ఆయన తన పదవి నిలబెట్టుకోవడానికి నానా తంటాలూ పడుతున్నారు. ఈ క్రమంలో రఘురామకృష్ణరాజు, వైసీపీ మధ్య నడుస్తున్న ‘ఫైట్‌’ రోజురోజుకీ కొత్త మలుపులు తిరుగుతోంది.

దాదాపుగా ప్రతిరోజూ ఆయన మీడియా ముందుకొస్తూ, వివిధ అంశాలపై మాట్లాడుతున్నారు. అయితే, గత కొద్ది రోజులుగా ఆయన సంయమనం కోల్పోతున్నారు. కొందర్ని ఉద్దేశించి తిట్టేస్తున్నారు. వైసీపీ నుంచి కొందరు తనకు ఫోన్‌ చేసి బెదిరింపులకు పాల్పడుతున్నారన్నది రఘురామకృష్ణరాజు ఆరోపణ. ‘ముఖ్యమంత్రికి వీర విధేయుడిని.. ఆయన్ని అభిమానిస్తాను.. ప్రేమిస్తాను..’ అని రఘురామ చెబుతోంటే, ఇంకోపక్క.. రఘురామని బూతులు తిడుతూ సోషల్‌ మీడియాలో చెలరేగిపోతున్నారు వైసీపీ అభిమానులు. సోషల్‌ మీడియాలో వచ్చే కామెంట్లు చూసి రఘురామ మరింతగా చెలరేగిపోతుండడం చూస్తోంటే, ఎక్కడో ఆయనలో అసహనం పెరిగిపోతోందన్న అనుమానం కలగకమానదు.

ఈ అసహనం, ఢిల్లీలో తాను అనుకున్నట్లుగా ‘అనుకూల వాతావరణం’ లేకపోవడం వల్లేనంటూ ఢిల్లీ నుంచి మీడియాకి లీకులు అందుతున్నాయి. రాష్ట్ర రాజధాని విషయంలో సరైన సమయంలో కేంద్రం జోక్యం చేసుకుంటుందని రఘురామ చెబితే, కేంద్రమేమో హైకోర్టుకు పలు సందర్భాల్లో సమర్పించిన అఫిడవిట్లలో ‘మా జోక్యం ఏమీ వుండదు’ అని తేల్చేస్తోంది. ఇలా చాలా విషయాల్లో ఢిల్లీ పెద్దల నుంచి రఘురామకు చుక్కెదురవుతుండడంతో ఆ అసహనం ఆయన ‘కొందరు వ్యక్తులపై’ ప్రదర్శిస్తున్నారట.

ఏదిఏమైనా, రఘురామ ఫ్రస్ట్రేషన్‌.. ఆయన పొలిటికల్‌ ఇమేజ్‌ని మరింత డ్యామేజీ చేస్తోంది. సోషల్‌ మీడియాలో నెటిజన్లు ఏవేవో కారుకూతలు కూస్తారు. సోషల్‌ మీడియానే అంత. అదో చెత్త కుప్పలా తయారైన మాట వాస్తవం. అదే సమయంలో కొందరు వైసీపీ నేతలూ, రఘురామపై అవాకులు చెవాకులు పేలుతున్న మాట వాస్తవం. కానీ, రాజుగారి హుందాతనం ఏమయ్యింది.? ‘త్వరలో రఘురామపై అనర్హత వేటు పడబోతోంది’ అనే ధీమా వైసీపీ వర్గాల్లో పెరుగుతోంటే, ఆటోమేటిక్‌గా రఘురామలో ఆత్మవిశ్వాసం కూడా సన్నగిల్లే అవకాశం లేకపోలేదు.