అచ్చెన్న ఆరాటం.. ‘బీసీ’ వాయిస్‌ అప్పుడెందుకు పెరగలేదో.!

వైఎస్‌ జగన్‌ హయాంలో ‘కీలక పదవులు’ అన్నీ ‘రెడ్డి’ సామాజిక వర్గానికే దక్కుతున్నాయన్నది నిర్వివాదాంశం. ఇందులో దాపరికం ఏమీ లేదు. కానీ, చంద్రబాబు హయాంలో ఏం జరిగింది.? అప్పుడు ‘కమ్మ’ సామాజిక వర్గానికి అగ్ర తాంబూళం దక్కింది. అప్పట్లో ‘కమ్మ’గా అనిపించిన చంద్రబాబు రాజకీయం, ఇప్పుడు వైఎస్‌ జగన్‌ రాజకీయం చేదుగా అనిపిస్తోంది మాజీ మంత్రి, టీడీపీ సీనియర్‌ నేత, టీడీపీ ఏపీ అధ్యక్షుడు కింజరాపు అచ్చెన్నాయుడికి. ఒక్కటి మాత్రం నిజం.. చంద్రబాబు, వైఎస్‌ జగన్‌ వేర్వేరు కాదు.! ఇద్దరూ దాదాపు సమానమే. కాకపోతే, ‘కులాభిమానం’ విషయంలో ఒకరికంటే ఇంకొకరు ఇంకాస్త ఎక్కువ.. అంతే తేడా.

‘బీసీల సంక్రాంతి’ అంటూ ఇటీవల వైఎస్‌ జగన్‌ ఓ కార్యక్రమంలో పాల్గొన్నారు. బీసీల్ని ఉద్ధరించేస్తున్నామని చెప్పుకున్నారు. అక్కడికి హాజరైన వైసీపీ బీజేపీ నేతలకు తెలియదా.. తమ పార్టీ హయాంలో కీలక పదవులు ఎవరికి దక్కుతున్నాయో. అంతెందుకు, వైసీపీ కోటరీ అంటే ఎవరు.? అందులో ఒక్కరైనా బీసీలు వున్నారా.? వైఎస్‌ జగన్‌ హయాంలో ‘రెడ్డి’ అనేది అదనపు క్వాలిఫికేషన్‌ అయిపోయింది కీలక పదవులకు సంబంధించి. చంద్రబాబు హయాంలో పోలీస్‌ విభాగంలో ప్రమోషన్‌కి సంబంధించి ‘కమ్మతి’ ప్రాధాన్యత ఇవ్వడం అప్పట్లో పెను దుమారం రేపింది. మరి, ఇప్పుడు ఏం జరుగుతోంది.? ‘అంతకు మించి’ అనే స్థాయిలో ఆయా విభాగాల్లో రెడ్డి సామాజిక వర్గానికి అత్యధిక అవకాశాలు అనూహ్యంగా దక్కుతున్నాయన్న వాదనలు వినిపిస్తున్నాయి. వైఎస్సార్సీపీ ప్రతిపక్షంలో వున్నప్పుడు టీడీపీ పాలనపైనా, టీడీపీ ప్రతిపక్షంలో వున్నప్పుడు వైఎస్సార్సీపీ పాలనపైనా.. విమర్శల్ని ఎలా అర్థం చేసుకోవాలి.? ఇద్దరూ ఇద్దరే.!

అప్పుడు వాళ్ళు, ఇప్పుడు వీళ్ళు.. తమవాళ్ళకి వీలైనంత ఎక్కువ ‘న్యాయం’ చేస్తున్నారంతే. చంద్రబాబు హయాంలో టీడీపీ అనుకూల మీడియా అడ్డగోలుగా ప్రకటనల రూపంలోనూ, ఇతరత్రా రూపంలోనూ సంపాదించింది. ఇప్పుడు వైసీపీ అనుకూల మీడియా పండగ చేసుకుంటోంది. మంత్రిగా పనిచేసిన అచ్చెన్నాయుడికి ఈ ‘కుల సమీకరణాలు’ తెలియవని ఎలా అనుకోగలం.? రేప్పొద్దున్న ప్రభుత్వం మారి, మళ్ళీ చంద్రబాబు గద్దెనెక్కితే.. ఇప్పుడు జగన్‌ ‘రెడ్డి’ సామాజిక వర్గంపై చూపిన ప్రేమకు పదింతలు ప్రేమ, చంద్రబాబు ‘కమ్మ’ సామాజిక వర్గంపై చూపుతారన్నది నిర్వివాదాంశం. అప్పుడు ‘మా బాబు.. బీసీల్ని ఉద్ధరించేస్తున్నాడు..’ అని అచ్చెన్న అనకుండా వుంటారా.?