ఆర్టీసీ సమ్మె.. తెగేదాకా లాగుతున్న కేసీఆర్‌.?

తెలంగాణలో ఆర్టీసీ సమ్మె ఇంకా కొనసాగుతూనే వుంది. ఆర్టీసీ కార్మికుల డిమాండ్లు న్యాయబద్ధమైనవేనని జనం అర్థం చేసుకున్నారు. న్యాయస్థానం సైతం ఈ విషయంలో కొంత సాఫ్ట్‌ కార్నర్‌తో వున్నట్లే కన్పిస్తోంది. ఓ పక్క ముఖ్యమంత్రి కేసీఆర్‌, సమ్మె చట్ట విరుద్ధం.. అని చెబుతోంటే, కార్మికులు సమ్మె విరమించాలనే ఆదేశాలు ఇవ్వలేమని న్యాయస్థానం చెబుతోందంటే.. పరిస్థితి తీవ్రతను అర్థం చేసుకోవచ్చు.

పదే పదే న్యాయస్థానం ప్రభుత్వానికి మొట్టికాయలు వేస్తోంది. ఆర్టీసీ నష్టాల విషయంలో, ఆస్తుల విషయంలో, అప్పుల విషయంలో ప్రభుత్వం సమర్పిస్తోన్న లెక్కలతో న్యాయస్థానం సంతృప్తి చెందడంలేదు సరికదా, తలంటు పోసేస్తోంది.! నిజానికి, ‘ఆర్టీసీ కార్మిక సంఘాలతో చర్చలు జరపాల్సిందే..’ అని ప్రభుత్వానికి హైకోర్టు సూచించినప్పుడే, ముఖ్యమంత్రి కేసీఆర్‌ మెట్టు దిగాల్సింది. కానీ, ఆయన ‘తగ్గే ప్రసక్తే లేదు’ అని తనను తాను ఇంకో లెవల్‌లో ఊహించుకుంటున్నారు.

నిజమే, కేసీఆర్‌ ముఖ్యమంత్రి పదవిలో వున్నారు గనుక, ఆయనలో ఆ మాత్రం అహం వుంటుంది. కానీ, రేప్పొద్దున్న ఆయన ప్రజల ముందుకు వెళ్ళాలి. ఇప్పుడు కాకపోతే, ఇంకో నాలుగేళ్ళ తర్వాత మరోమారు జనం వద్దకు వెళ్ళి ‘నన్ను గెలిపించండి మహాప్రభో’ అని వేడుకోవాల్సిందే. అప్పుడు ఇదే ఆర్టీసీ కార్మికుల కుటుంబాలకు ఆయన ఏం సమాధానం చెబుతారు.?

తెగేదాకా లాగడం మంచిది కాదన్న విషయం కేసీఆర్‌ కంటే ఇంకెవరికి బాగా తెలుస్తుంది.? కానీ, ఆయన ఇక్కడ తెగ్గొట్టుకోవడం వైపే మొగ్గు చూపుతున్నారు. అంటే, ప్రభుత్వం మీద ఏదో అదృశ్య శక్తి తాలూకు ఒత్తిడి పనిచేస్తోందని అని అర్థం చేసుకోవాలా.? అన్నది కార్మిక సంఘాల ఆరోపణ. అందులో నిజం లేదని అనుకోగలమా.!