ఫాదర్‌ ఆఫ్‌ ఇండియా నరేంద్ర మోడీ: ట్రంపు గుభాలింపు

భారతదేశ ప్రధాని నరేంద్ర మోడీని ఉద్దేశించి అమెరికా అధ్యక్షుడు ‘ఫాదర్‌ ఆఫ్‌ ఇండియా’ అని అభివర్ణించడం గొప్ప విషయమే. ఇందులో ఎవరికీ ఎలాంటి సందేహాలూ కలగాల్సిన అవసరం లేదు. కానీ, సందేహాలు కలుగుతున్నాయి. కారణం, అమెరికా అధ్యక్షుడు డోనాల్డ్‌ ట్రంప్‌ డొల్లతనమే. ట్రంప్‌, అమెరికా అధ్యక్షుడిగా గెలవడం ఓ చారిత్రక అద్భుతం. ఎన్నికల సమయంలో ట్రంప్‌ ఎదుర్కొన్న విమర్శలు అన్నీ ఇన్నీ కావు. ‘స్త్రీ లోలుడు’ అనే ఆరోపణలు సహా, చాలా ఆరోపణలు ఆయన మీద వచ్చాయి. అది గతం.

పలుమార్లు ఇండియాని ట్రంప్‌ పొగిడాడు, చాలాసార్లు తిట్టాడు కూడా. అమెరికాలోని భారతీయుల్ని వేధింపులకి గురిచేసేందుకూ ట్రంప్‌ కొన్ని విధానపరమైన నిర్ణయాలు తీసుకోవడం అప్పట్లో వివాదాస్పదమయ్యింది. కానీ, ఇప్పుడు పరిస్థితి మారింది. అమెరికాలో మళ్ళీ అధ్యక్ష ఎన్నికలకు రంగం సిద్ధమవుతోంది. ఇంకోసారి గెలవాలన్న కసితో వున్నాడు ట్రంప్‌. ఈ క్రమంలోనే భారత ప్రధానిని కీర్తించే పనిలో పడ్డాడు. అమెరికాలో భారతీయుల సంఖ్య గణనీయంగా పెరుగుతోంది.

భారతదేశంలోనే కాదు, ప్రపంచ దేశాల్లోని భారతీయులంతా నరేంద్ర మోడీకి ‘జై’ కొడుతున్న రోజులివి. సరిగ్గా, ఇక్కడే ట్రంప్‌, అసలు సిసలు ‘ట్రంప్‌ కార్డ్‌’ని ప్రయోగించాడు. అదీ అసలు సంగతి. నిజానికి, భారత ప్రధానుల్ని గతంలోనూ వివిధ దేశాలకు చెందిన అధినేతలు ప్రశంసించారు. నెహ్రూ, ఇందిర, రాజీవ్‌, పీవీ నరసింహారావు, మన్మోహన్‌సింగ్‌, వాజ్‌పేయి.. ఇంకా చాలామంది ఆ లిస్ట్‌లో వుంటారు. కానీ, మోడీ లెక్క వేరే.

మన ప్రధానిని అమెరికా అధ్యక్షుడు పొగిడారు గనుక.. అది మనందరికీ గర్వకారణమే. అయితే, అమెరికా – భారత్‌ మధ్య వాణిజ్య ఒప్పందాలకు రంగం సిద్ధమవుతోంది. ఈ ఒప్పందాల మాటున, దేశ ప్రయోజనాలు దెబ్బతినే పరిస్థితి ఏమన్నా వుంటుందా.? ఆ కోణంలోనే ట్రంప్‌ తెలివిగా, ముందరి కాళ్ళకు బంధనం వేశాడా.? అన్నది వేచి చూడాల్సిందే.