ఆ విషయంలో బాబును కొట్టేవారే లేరు!

ఉద్రిక్తతలు, నిరసనలు, ఆందోళనల నడుమ ఏపీలో అధికార, విపక్షాలు చేపట్టిన చలో ఆత్మకూరు కార్యక్రమాన్ని పోలీసులు భగ్నం చేశారు. వైఎస్సార్ సీపీ బాధితులంటూ తెలుగుదేశం పార్టీ.. టీడీపీ బాధితులంటూ వైఎస్సార్ సీపీ పోటాపోటీగా బాధిత శిబిరాలు నిర్వహించిన సంగతి తెలిసిందే. ఈ నేపథ్యంలో రెండు పార్టీలూ చలో ఆత్మకూరుకు పిలుపునివ్వగా.. పోలీసులు వ్యూహాత్మకంగా వ్యవహరించి భగ్నం చేశారు. టీడీపీ అధినేత చంద్రబాబును ఉండవల్లిలోని ఆయన నివాసంలో హౌస్ అరెస్టు చేశారు.

ఈ పరిణామాలన్నీ ముందుగానే ఊహించిన చంద్రబాబు.. ప్రతి అంశాన్నీ మీడియాలో హైలైట్ అయ్యేలా చూసుకున్నారు. ఆయనకు అనుకూలంగా ఉన్న తెలుగు మీడియా అంతా ఈ విషయానికి ఎనలేని ప్రాధాన్యం ఇచ్చి కవర్ చేయగా.. జాతీయ మీడియాలో సైతం ఇదంతా కవర్ అయ్యేలా బాబు టీం జాగ్రత్తలు తీసుకుంది. దీంతో రోజంతా ఈ అంశంపై జాతీయ మీడియా కథనాలు, బ్రేకింగ్ న్యూస్ లతో కుమ్మేసింది. వాస్తవానికి ప్రాంతీయ అంశాలను.. అందులోనూ తెలుగు రాష్ట్రాలకు సంబంధించిన విషయాలకు అంతగా ప్రాధాన్యం ఇవ్వని నేషనల్ మీడియా.. పబ్లిసిటీ స్టంట్ కోసం నడుస్తున్న కార్యక్రమానికి సంబంధించి ఇంతగా కవరేజ్ చేయడానికి కారణమేమిటా అని ఆరా తీస్తే విస్తుపోయే విషయాలు వెల్లడయ్యాయి.

Also Read: వైసీపీ వర్సెస్‌ టీడీపీ: ‘పల్నాడు’ ఫైట్‌లో గెలిచిందెవరు.?

ఈ విషయంలో రెండు రోజుల ముందు నుంచి టీడీపీ పబ్లిసిటీ వింగ్ అత్యంత పకడ్బందీగా వ్యవహరించినట్టు తెలిసింది. హైదరాబాద్, ఢిల్లీల్లో ఉంటే నేషనల్ మీడియా సిబ్బందికి క్షణం క్షణం అప్ డేట్స్ ఇవ్వడంతోపాటు వివిధ టీవీ ఛానళ్ల ప్రతినిధులు ఉండవల్లి, ఆత్మకూరు రావడానికి విమాన టికెట్లు సమకూర్చడంతోపాటు ఇతరత్రా రవాణా సదుపాయాలు కూడా ఏర్పాటు చేసినట్టు తెలిసింది. ఇవే కాకుండా పెద్ద మొత్తంలో పైసలు కూడా చేతులు మారినట్టు సమాచారం. దీంతో జాతీయ మీడియాలో ఒక రేంజ్ లో బాబు మళ్లీ హైలైట్ అయ్యారు. చలో ఆత్మకూరు భగ్నమైనా తాను అనుకున్నది సాధించారు.

మరోవైపు ఈ విషయంలో అధికార వైఎస్సార్ సీపీ తేలిపోయింది. ఒక్క సాక్షి ఛానల్ మినహా మిగిలిన ఏ ఛానల్ లోనూ అనుకున్నంత ప్రచారం జరగలేదు. పైగా జాతీయ మీడియాలో ఏకంగా నెగిటివ్ కథనాలు ప్రసారం కావడం ఆ పార్టీ కేడర్ కి మింగుడుపడటంలేదు. విపక్షంలో ఉన్నప్పుడు ఎలాగూ మీడియా మద్దతు లేదని, అధికారంలో ఉన్నప్పుడు కూడా ఇదే పరిస్థితి ఏమిటని వారు తలలు పట్టుకుంటున్నారు. టీడీపీ పబ్లిసిటీ వింగ్ పనిచేసినంత సమర్థంగా వైఎస్సార్ సీపీ మీడియా వింగ్ పనిచేయకపోవడమే ఇందుకు కారణమనే అభిప్రాయాలు వ్యక్తమవుతున్నాయి. మొత్తానికి అధికారంలో ఉన్నా, లేకపోయినా మీడియాను మేనేజ్ చేయడంలో తనకు తానే సాటి అని చంద్రబాబు మరోసారి నిరూపించుకున్నారు. ఈ విషయంలో ఆయన్ను కొట్టేవారే లేరనడం అతిశయోక్తి కాదేమో.