తెలుగుదేశం పార్టీ అధినేత నారా చంద్రబాబునాయుడు జైల్లో మగ్గిపోవాల్సిందేనట.! వైసీపీ నేతలు కొందరు ఇదే మాట చెబుతున్నారు. అధికార పార్టీ నేతలు చెబుతున్నారంటే, తెరవెనుకాల స్కెచ్ గట్టిగానే వుందన్నమాట. మరికొన్ని కేసులు చంద్రబాబు మీద నమోదు చేసి, ఆయన్ని ఇరకాటంలో పెట్టేందుకు వైసీపీ సర్కారు విశ్వ ప్రయత్నాలూ చేస్తోంది.
స్కిల్ డెవలప్మెంట్ స్కామ్ వ్యవహారానికి సంబంధించి ఇంతవరకు చంద్రబాబు తరఫు లాయర్లు బెయిల్ పిటిషన్ న్యాయస్థానంలో మూవ్ చెయ్యకపోవడం అందర్నీ విస్మయానికి గురిచేస్తోంది. క్వాష్ పిటిషన్పై నేడు తీర్పు తమకు అనుకూలంగా వస్తుందని చంద్రబాబు తరఫు న్యాయవాదులు భావించారుగానీ.. ఈ కేసులోనూ విచారణ వచ్చే మంగళవారానికి వాయిదా పడింది.
ఈలోగా, స్కిల్ డెవలప్మెంట్ స్కామ్కి సంబంధించి ట్రయల్ కోర్టు వ్యవహారాలు చేపట్టకూడదని హైకోర్టు పేర్కొనడం గమనార్హం. అంటే, చంద్రబాబు కస్టడీ పిటిషన్ సంగతి కూడా, వచ్చే మంగళవారం వరకూ అలాగే పెండింగ్లో వుంటుందన్నమాట. కానీ, ఇలా ఎన్నాళ్ళు.?
చంద్రబాబేమో, స్కిల్ డెవలప్మెంట్ కేసులో బెయిల్ని కోరుకోవడంలేదు. అది అసలు అర్థం పర్థం లేని కేసు కాబట్టి, తన మీద మోపిన అభియోగాల్ని పూర్తిగా కొట్టేయాల్సిందిగా న్యాయ పోరాటం చేస్తామంటున్నారట చంద్రబాబు.! కానీ, చంద్రబాబు అనుకున్నట్టు జరుగుతుందా.? ఈ కేసులో చంద్రబాబు అసలు బయటకే రాలేరని వైసీపీ బలంగా నమ్ముతోంది.
ఇంకో ఆరు నెలల్లోపు చంద్రబాబు జైలు నుంచి బయటకు వచ్చే అవకాశమే లేదంటూ వైసీపీ నేతలు కుండబద్దలుగొట్టేస్తున్నారు. బెయిల్ కోసం చంద్రబాబేమో ప్రయత్నాలు చేయడంలేదు. నిజానికి, సుప్రీంకోర్టు సీనియర్ న్యాయవాది సిద్దార్ధ లూధ్రా తలచుకుంటే, బెయిల్ తెచ్చెయ్యడం పెద్ద విషయం కాదు.
న్యాయం దొరకనప్పుడు.. కత్తి పట్టాల్సిందేనంటూ సిద్దార్ధ లూద్రా ఓ ‘కొటేషన్’ని పోస్ట్ చేశారు. అయితే, కత్తి పట్టడం అనేది కూడా న్యాయ మార్గంలోనే.. అంటూ లూద్రా వివరణ ఇచ్చుకున్నారనుకోండి.. అది వేరే సంగతి. లూద్రా తాజాగా, చంద్రబాబుని రాజమండ్రి జైల్లో కలిశారు.
2024 ఎన్నికల్లో చంద్రబాబు జైలు నుంచి బయటకు రాకపోతే ఏం జరుగుతుంది.? జైల్లో వుండే, చంద్రబాబు ఎన్నికల నామినేషన్ ఫైల్ చేస్తారా.? చంద్రబాబుకి బదులుగా ఆయన సతీమణి భువనేశ్వరి కుప్పం నుంచి పోటీ చేస్తారా.? బోల్డన్ని ఇలాంటి ప్రశ్నలు తెరపైకొస్తున్నాయ్.!