Vijay: తమిళ స్టార్ హీరో విజయ్ (Vijay) ప్రత్యక్ష రాజకీయాల్లోకి అడుగు పెట్టారు. సోషల్ మీడియా వేదికగా ఆయన ఈ ప్రకటన చేశారు. తమిళగ వెట్రి కళగం (టీవీకే) పేరుతో కొత్త రాజకీయ పార్టీ స్థాపిస్తున్నట్టు వెల్లడించారు విజయ్. దీంతో రాజకీయాల్లోకి వస్తున్నారు.. కొత్త పార్టీ స్థాపిస్తున్నారని కొన్నాళ్లుగా జరుగుతున్న ప్రచారానికి చెక్ పెట్టినట్టైంది. పార్టీ గుర్తు, జెండా, అజెండాను త్వరలో ప్రకటిస్తామని తెలిపారు.
త్వరలో జరుగనున్న లోక్ సభ ఎన్నికల్లో పోటీ చేయమని.. మరే పార్టీకి కూడా మద్ధతు ఇవ్వమని అన్నారు. 2026లో జరిగే తమిళనాడు అసెంబ్లీ ఎన్నికల్లోనే తాము పోటీ చేస్తామని స్పష్టం చేశారు. రజినీకాంత్ తర్వాత అంతటి ఇమేజ్ సంపాదించారు విజయ్. అభిమానులను ఏడాదికి రెండుసార్లు కలుసుకుంటారు.. బహుమతులు అందజేస్తారు.
ఇటివల సేవా కార్యక్రమాలనూ విస్తృతం చేశారు. పది, ఇంటర్మీడియట్ విద్యలో ప్రతిభ చూపిన విద్యార్ధులకు ప్రోత్సాహకాలు అందిస్తున్నారు. విజయ్ మక్కల్ ఇయక్కం (విజయ్ అభిమాన సంఘం) సభ్యులతో సమావేశమై రాజకీయ పార్టీపై సుదీర్ఘ చర్చలు నిర్వహించారు.