కరోనా వస్తదీ.. పోతదీ.! సారూ, ఏం సెప్తిరి.!

తెలంగాణలో నిన్న నమోదైన కరోనా పాజిటివ్‌ కేసుల సంఖ్య 1850. వీటిల్లో గ్రేటర్‌ హైద్రాబాద్‌ వాటా 1572. ఆషామాషీ వ్యవహారం కాదు. తెలంగాణలో కరోనా వైరస్‌ (కోవిడ్‌ 19) విజృంభణకి నిలువెత్తు నిదర్శనం ఈ లెక్కలు. మరీ ముఖ్యంగా గ్రేటర్‌ వాసులు హడలిపోతున్నారు కరోనా వైరస్‌ దెబ్బకి. ‘బతుకు జీవుడా’ అంటూ హైద్రాబాద్‌ వదిలిపోతున్నారు చాలామంది. కానీ, తెలంగాణ ప్రభుత్వం మాత్రం ‘ఏం ఫర్లేదు.. ఆల్‌ ఈజ్‌ వెల్‌..’ అంటోంది.

మంత్రి తలసాని శ్రీనివాస్‌ యాదవ్‌ తాజాగా ఓ ఇంటర్వ్యూలో మాట్లాడుతూ, ‘రానున్న రెండు మూడు నెలల్లో కరోనా పాజిటివ్‌ కేసుల సంఖ్య ఇంకా ఎక్కువ కాబోతోంది..’ అని సెలవిచ్చారు. అంతేనా, ‘కొంతమందికి కరోనా వచ్చినట్లు కూడా తెలియదు. కరోనా వస్తదీ.. పోతదీ..’ అంటూ చాలా లైట్‌గా మాట్లాడేశారు. పూర్తిస్థాయిలో ఇమ్యూనిటీ వున్నవారిపై కరోనా వైరస్‌ పెద్దగా ప్రభావం చూపకపోవచ్చని వైద్యులు చెబుతున్న మాట వాస్తవం. కానీ, దాన్నే ప్రమాణికంగా తీసుకుని, ‘లైట్‌ తీస్కో’మంటే ఎలా.?

కరోనా విషయంలో పెద్దగా భయపడాల్సిన పనే లేకపోతే, లాక్‌డౌన్‌ ఎందుకు విధించినట్లు.? ప్రజల్ని ఎందుకు ఇబ్బందులపాల్జేసినట్లు.? మాస్క్‌ వేసుకోకపోతే జరీమానా.. సోషల్‌ డిస్టెన్సింగ్‌ పాటించకపోతే చర్యలు.. ఇవన్నీ ఎందుకు.? ఈ ప్రశ్నలు ప్రభుత్వం వైపే సూటిగా దూసుకెళుతున్నాయి. అసలంటూ కరోనా ముప్పు తీవ్రమయ్యింది మద్యం షాపులు తెరిచాకే. ఆ తర్వాత విశృంఖలంగా మారిపోయింది కరోనా వైరస్‌.

తెలంగాణలోనే కాదు, ఇతర రాష్ట్రాల్లోనూ పరిస్థితి తీవ్రంగానే వున్నా, తెలంగాణలో ఆ పరిస్థితి మరింత భయానకంగా మారింది. జరగాల్సిన స్థాయిలో కరోనా టెస్టుల సంఖ్య లేకపోవడంతో ప్రజల్లో ఆందోళన పెరగడం సహజమే. అలాగని టెస్టులు చేసేస్తే, భయం తగ్గుతుందా.? అంటే అదీ సబబు కాదు. పాజిటివ్‌ కేసుల సంఖ్య 2 వేల లోపు నమోదయితేనే ఇంతటి భయాందోళన వుంది జనంలో. రేప్పొద్దున్న 3 వేలు దాటేసి.. ఆ పై ఇంకా సరికొత్త రికార్డులు సృష్టిస్తే ఇంకేమన్నా వుందా.? ప్రజలకు భరోసా ఇవ్వాల్సిన బాధ్యత పాలకులదే. ‘అందుబాటులో వైద్యం’ అని ప్రభుత్వం చెబుతోంటే, వైద్యం అందక ప్రాణాలు కోల్పోతున్న సందర్భాలు కళ్ళదుటే కన్పిస్తున్నాయి జనానికి. ప్రభుత్వాలకి ‘కమర్షియల్‌ యాక్టివిటీ’ పెరగాలి.. మరి, ప్రజారోగ్యం మాటేమిటి.? ఈ ప్రశ్నకు ప్రభుత్వాల వద్ద సరైన సమాధానమే దొరకని దుస్థితి.