మోడీ వద్దకు చంద్రబాబు: సుజనా చౌదరి మధ్యవర్తిత్వం.?

తెలుగుదేశం పార్టీ అధినేత నారా చంద్రబాబునాయుడు, భారత ప్రధాని నరేంద్ర మోడీతో సమావేశమవబోతున్నారట. ఈ భేటీ కొద్ది రోజుల్లోనే జరగబోతోందని తెలుస్తోంది. మాజీ కేంద్ర మంత్రి, రాజ్యసభ సభ్యుడు, బీజేపీ నేత సుజనా చౌదరి ఈ భేటీకి మధ్యవర్తిత్వం వహిస్తున్నారంటూ అత్యంత విశ్వసనీయ వర్గాల సమాచారం ప్రకారం తెలుస్తోంది. రాజధాని అమరావతి సహా పలు అంశాలపై ఈ భేటీలో చర్చ జరగబోతోందట.

రాష్ట్రానికి మూడు రాజధానులంటూ ముఖ్యమంత్రి వైఎస్‌ జగన్‌ మోహన్‌ రెడ్డి తెరపైకి తెచ్చిన ప్రతిపాదన పట్ల మాజీ ముఖ్యమంత్రి చంద్రబాబు తీవ్ర అభ్యంతరం వ్యక్తం చేస్తున్న విషయం విదితమే. ఈ విషయమై రాష్ట్ర బీజేపీ కూడా, వైఎస్‌ జగన్‌ ఆలోచనను తప్పుపడుతోంది. కర్నూలులో హైకోర్టు విషయమై బీజేపీ మద్దతిస్తున్నా, రాజధాని అమరావతిని విశాఖకు తరలించాలన్న ఆలోచనను ఆ పార్టీ నేతలు వ్యతిరేకిస్తున్నారు.

అమరావతి ప్రాంత రైతులకు ఇప్పటికే బీజేపీ రాష్ట్ర అధ్యక్షుడు కన్నా లక్ష్మినారాయణ మరికొందరు బీజేపీ ముఖ్య నేతలు మద్దతిచ్చారు. మరోపక్క, చంద్రబాబు కంటే ముందే ఏపీ బీజేపీ ముఖ్య నేతలంతా ఢిల్లీకి వెళ్ళి అమరావతి విషయమై ప్రధానితో చర్చించేందుకు సమాయత్తమవుతున్నారట. అయితే, సుజనా చౌదరితోపాటు సీఎం రమేష్‌ కూడా చంద్రబాబు – మోడీ భేటీపై ఢిల్లీ స్థాయిలో కసరత్తులు చేపట్టారనీ, ప్రధాని మోడీ నుంచి ఈ భేటీకి గ్రీన్‌ సిగ్నల్‌ దాదాపు లభించినట్లేనని అంటున్నారు.

కాగా, రాజధాని తరలింపు – మూడు రాజధానుల ఎపిసోడ్‌ విషయమై ప్రధాని నరేంద్ర మోడీ సైతం అసహనం వ్యక్తం చేస్తున్నారనే ప్రచారం జరుగుతోంది. అమరావతికి శంకుస్థాపన ప్రధాని నరేంద్ర మోడీ చేతుల మీదుగానే జరిగింది. అన్నట్టు, రాజధాని రైతులు కూడా ఇప్పటికే ప్రధాని నరేంద్ర మోడీకి రాష్ట్ర ప్రభుత్వ తీరుని నిరసిస్తూ తమ వాదనల్ని ప్రస్తావిస్తూ లేఖలు పంపిన విషయం విదితమే.