బీజేపీకి సీమ సంకటం: ససేమిరా అంటున్న వీర్రాజు.!

‘రాయలసీమ అభివృద్ధి..’ అంటూ బీజేపీ కొత్త పల్లవి అందుకుంది. రాయలసీమ అభివృద్ధి మాత్రమేనా.? ఉత్తరాంధ్ర పరిస్థితేంటి.? అసలు మొత్తంగా 13 జిల్లాల ఆంధ్రప్రదేశ్‌ పరిస్థితేంటి.? అన్న ప్రశ్నలు ఒకదాని వెంట ఒకటి తెరపైకి రావడం సహజమే. ఎందుకంటే, 13 జిల్లాల ఆంధ్రప్రదేశ్‌, విభజనతో పూర్తిస్థాయిలో నష్టపోయింది. ఆ నష్టం నుంచి రాష్ట్రాన్ని గట్టెక్కించాల్సిన బాధ్యత కేంద్ర ప్రభుత్వానిదే.

ప్రత్యేక హోదా ఇచ్చి, తగిన రాయితీలు ప్రకటించి, విభజన చట్టంలోని అంశాల్ని నెరవేర్చి వుంటే.. పరిస్థితి ఇంకోలా వుండేది. 13 జిల్లాల ఆంధ్రప్రదేశ్‌ ఏర్పడి ఏడేళ్ళు గడుస్తున్నా, ఇంతవరకు రాజధాని వివాదం నుంచే రాష్ట్రం గట్టెక్కలేదు. దీనికి నైతిక బాధ్యత వహించాల్సింది కేంద్రంలో అధికారంలో వున్న భారతీయ జనతా పార్టీతోపాటు గతంలో రాష్ట్రంలో అధికారంలో వున్న టీడీపీ, ప్రస్తుతం రాష్ట్ర ప్రభుత్వాన్ని ఏలుతోన్న వైఎస్సార్‌ కాంగ్రెస్‌ పార్టీ కూడా.

ఇక, రాయలసీమ వ్యవహారమై బీజేపీ ఒకింత అత్యుత్సాహం ప్రదర్శిస్తోంది. తిరుపతి ఉప ఎన్నిక వేళ బీజేపీ ప్రదర్శిస్తోన్న ఈ వింత ప్రేమ రాజకీయంగా చర్చనీయాంశమవుతోంది. మరోపక్క, ‘సీమ’ సెంటిమెంట్‌ని రగుల్చుతూ, కొందరు సీమ నేతలు ‘ప్రత్యేక రాయలసీమ రాష్ట్రం’ అనే నినాదాన్ని తెరపైకి తెచ్చారు. ఈ నినాదంతో బీజేపీ ఉలిక్కిపడాల్సి వస్తోంది.

ఈ ప్రత్యేక రాయలసీమ డిమాండ్‌ వెనుక అధికార పార్టీ హస్తం సుస్పష్టం. రాష్ట్రంలో అలజడులకు వైసీపీ స్కెచ్‌ వేసిందనీ, ఈ క్రమంలో ప్రత్యేక రాయలసీమ డిమాండ్‌ని తెరపైకి తెచ్చిందనీ వైసీపీ మీద ఇతర రాజకీయ పార్టీలే కాదు, రాజకీయ విశ్లేషకులూ అనుమానాలు వ్యక్తం చేస్తుండడం గమనార్హం.

కాగా, ఈ వ్యవహారంపై స్పందించిన బీజేపీ, ‘ప్రత్యేక రాయలసీమకు ఎట్టి పరిస్థితుల్లోనూ మద్దతివ్వం.. ఇప్పటికే విభజనతో నష్టపోయాం. మళ్ళీ ఇప్పుడు విభజన డిమాండ్‌ తెరపైకి తీసుకురావడం సబబు కాదు..’ అంటోంది. ఏమో, రాజకీయాల్లో ఏమైనా జరగొచ్చు. ఎవరి రాజకీయ ప్రయోజనాలు వాళ్ళవి. ఉమ్మడి తెలుగు రాష్ట్రం నుంచి ఆంధ్రప్రదేశ్‌ వేరుపడుతుందని ఎవరైనా ఊహించారా.?