అదే జరిగితే ఇక ఆడాళ్లు ఉండరేమో..?

వైద్య రంగం ఎంతగా అభివృద్ధి చెందినా.. ఆడపిల్ల పుట్టాలా లేక మగపిల్లోడే పుట్టాలా అనే విషయంలో మాత్రం ఎలాంటి టెక్నాలజీ రాలేదు. మనిషి అంతరిక్షాన్నే జయించినా.. చావును, పుట్టుకను మాత్రం జయించలేదు. ఇది సృష్టి ధర్మం ప్రకారం జరగాల్సిందే. అయితే, తాజాగా జాతీయ పాడి పరిశ్రమాభివృద్ధి మండలి (ఎన్ డీడీబీ) అభివృద్ధి చేసిన కొత్త సాంకేతికత చర్చనీయాంశమైంది. కోడె దూడలు కాకుండా కేవలం ఆడ దూడలే పుట్టేలా సరికొత్త సాంకేతికను తాము తీసుకొచ్చామని, క్షేత్రస్థాయి పరిశీలనలో మంచి ఫలితాలు వచ్చాయని పేర్కొంది.

ఈ సాంకేతికతో ఇటీవల తమిళనాడులో మొదటి ఆవుదూడ పుట్టిందని తెలిపింది. ఆవులే పుట్టేలా విభజించిన వీర్యాన్ని ఉపయోగించి ఈ ప్రయోగంలో విజయం సాధించామని వెల్లడించింది. అంటే.. కోడె దూడ కావాలంటే కోడె దూడ, ఆడదూడ కావాలంటే ఆడదూడ పుట్టించేయడం సాధ్యమవుతుందన్నమాట. ఇదే జరిగితే అందరూ ఆడదూడలే కావాలని ఎగబడతారు. ఇది వాటికే పరిమితమైపోదు కదా.. మనుషుల్లోనూ ఈ సాంకేతికత అభివృద్ధి చెందితే ఏం జరుగుతుంది అంటూ చర్చ జరుగుతోంది.

ఇప్పటికే ప్రముఖుల వీర్యంతో గర్భధారణ చేయడం చూస్తున్నాం. అంటే వారిలా తమ పిల్లలూ కావాలనే తల్లిదండ్రుల కోరికను కొందరు అలా క్యాష్ చేసుకుంటున్నారు. ఇక అబ్బాయి కావాలంటే అబ్బాయే పుట్టే టెక్నాలజీ వస్తే.. చాలామంది అబ్బాయిలే కావాలనుకుంటారు. అంటే అమ్మాయిలు కనుమరుగైపోతారు. ఇప్పటికే అబ్బాయిలకు సరిపడా అమ్మాయిల నిష్పత్తి లేదు.

ఈ దశలో సృష్టికి విరుద్దమైన ఈ టెక్నాలజీ మానవ మనుగడనే సవాల్ చేసే పరిస్థితి తీసుకొస్తుంది. అయితే, ఈ టెక్నాలజీ రావడం అంత ఆషామాషీ కాదు. ప్రస్తుతం ఆవులో విజయవంతమైంది అని చెబుతున్న ఈ ప్రయోగంలో నిజమెంత అనేది ఇప్పుడే నిర్ధారణకు రావడం కష్టం. అయితే, సృష్టి ధర్మం ఎలా ఉందో అలా జరిగినప్పుడే అందరికీ మంచిది అనడంలో ఎలాంటి సందేహం లేదు.