ఆ హీరోయిన్లనే రిపీట్ చేస్తున్న దర్శకుడు ?

ప్రస్తుతం నాని ఎన్నో ఆశలు పెట్టుకున్న జెర్సీ ఈ నెల 19న విడుదలకు సిద్ధమైంది. ఇప్పటికే భారీ అంచనాల మధ్య జోరుగా బిజినెస్ కూడా జరుపుకున్న ఈ సినిమా నిజంగా నాని కెరీర్ లో ప్రత్యేకమైన సినిమాగా పేర్కొనవచ్చు. ఈ సినిమాకోసం ఎంతో ఎఫర్ట్ పెట్టాడు నాని. ఈ సినిమా తరువాత నాని నటించే మరో సినిమాకు సన్నాహాలు జరుగుతున్న సంగతి తెలిసిందే. ఇంద్రగంటి మోహనకృష్ణ దర్శకత్వంలో తెరకెక్కే ఈ చిత్రం కోసం ఇప్పటికే ప్రీ ప్రొడక్షన్ పనులు పూర్తీ కావొచ్చాయి. నాని తో పాటు సుధీర్ బాబు నటించే ఈ మల్టి స్టారర్ సినిమాలో ఇద్దరు హీరోయిన్స్ ని ఫైనల్ చేసాడట దర్శకుడు.

వ్యూహం పేరుతొ తెరకెక్కే ఈ సినిమాలో ఇద్దరు హీరోయిన్స్ గా అతిథిరావు హైదరి, నివేద థామస్ లను ఎంపిక చేసినట్టు సమాచారం. గతంలో ఈ దర్శకుడు ఈ ఇద్దరి హీరోయిన్స్ తో పనిచేసాడు. అతిథి రావు హైదరి, సుధీర్ బాబులతో సమ్మోహనం సినిమా చేసాడు. ఇక నివేద థామస్, నాని లతో జెంటిల్మెన్ సినిమా చేసిన విషయం అందరికి తెలుసు. దిల్ రాజు నిర్మిస్తున్న ఈ సినిమాలో నాని పాత్ర కాస్త నెగిటివ్ ఛాయలతో ఉంటుందని, పైగా అతని పాత్ర సినిమాలో ఎక్కువ సేపు ఉండదని అంటున్నారు.

ఇక నాని, సుధీర్ బాబు కలిసి నటిస్తున్న ఈ సినిమాకోసం దర్శకుడు తనకు కంఫర్ట్ ఇచ్చే హీరోయిన్స్ ని ఎంపిక చేయడం విశేషం. ఎందుకంటే ఇప్పటికే వారిద్దరితో ఈ దర్శకుడు పనిచేసాడు కాబట్టి. వారి కెమిస్ట్రీ, టైమింగ్ అన్ని తెలుసు కాబట్టి కొత్త రిక్స్ ఎందుకని అనుకున్నాడో ఏమో, కానీ మొత్తానికి తన హీరోయిన్స్ ని ఫైనల్ చేసాడు. సుధీర్ బాబు పోలీస్ అధికారిగా కనిపిస్తాడని, ఈ సినిమా జులై నుండి సెట్స్ పైకి వెళ్లనున్నట్టు తెలిసింది. త్వరలోనే షూటింగ్ పూర్తీ చేసి దీపావళికి విడుదల అయ్యేలా ప్లాన్ చేస్తున్నారట.