కర్నూలులో ఒవైసీ రాజకీయం.. వైసీపీకే అనుకూలం.!

బీజేపీ హిందుత్వం రాష్ట్రానికీ, దేశానికీ ప్రమాదకరంగా మారుతోందంటూ మజ్లిస్ పార్టీ అధినేత అసదుద్దీన్ ఒవైసీ విమర్శించారు. నిజానికి, ఒవైసీ ఇలా బీజేపీని విమర్శించడం కొత్తేమీ కాదు. అలా ఆయన విమర్శించకపోతే, మజ్లిస్ పార్టీ ఉనికికే అర్థం లేదు. మైనార్టీ ఓటు బ్యాంకుని రెచ్చగొట్టడం తప్ప, మజ్లిస్ పార్టీ రాజకీయంగా ఇంతప్పటిదాకా ఎవర్నీ ఉద్ధరించిన పాపాన పోలేదన్నది ఓపెన్ సీక్రకెట్. అయినా, కర్నూలులో అసదుద్దీన్ ఒవైసీకి ఏం పని.? అంటే, కేవలం హైద్రాబాద్‌కే ఒకప్పుడు పరిమితమైన మజ్లిస్ పార్టీ, ఇప్పుడు దేశవ్యాప్తంగా విస్తరించింది.

ఆయా ప్రాంతాల్లో మైనార్టీ ఓటు బ్యాంకు ఎక్కువగా వున్న ప్రాంతాల్లో ఇతర పార్టీల మద్దతుతో మజ్లిస్ తన ఉనికిని చాటుకుంటోంది. ఏపీలోనూ విస్తరించేందుకు మజ్లిస్ సన్నాహాలు చేసుకుంటోంది. ఈ క్రమంలోనే మునిసిపల్ ఎన్నికల సమయంలో మజ్లిస్ అధినేత కర్నూలుకి వెళ్ళారు. జగన్ మీద విమర్శలు చేస్తూనే, బీజేపీ హిందుత్వ రాజకీయాల్ని జగన్ తిప్పికొట్టాలని పిలుపునివ్వడం ద్వారా మైనార్టీ ఓటు బ్యాంకుని జగన్ వైపు ఎగదోసేందుకు ప్రయత్నించారు అసదుద్దీన్ ఒవైసీపీ. 2019 ఎన్నికల్లో వైసీపీకి సహకరిస్తే, కర్నూలులో తన పర్యటనకు ఇబ్బందులు కలిగించారని మజ్లిస్ అధినేత వ్యాఖ్యానించడం వ్యూహాత్మకమే. అసదుద్దీన్ రాజకీయాలు ఇలాగే వుంటాయి.

గ్రేటర్ ఎన్నికల వేళ అటు గులాబీ పార్టీకీ, ఇటు కమలం పార్టీకీ.. తెరవెనుకాల అండదండలు అందించింది మజ్లిస్. ఆ పార్టీకి ఎవరూ శాశ్వత మిత్రులు, శాశ్వత శతృవులు వుండరు. ఇదిలా వుంటే, 2024 ఎన్నికల నాటికి కనీసం పది చోట్ల ఏపీలో పోటీ చేయాలనే లక్ష్యంతో మజ్లిస్ పార్టీ వ్యూహాత్మకంగా పావులు కదుపుతోందట. ఈ మేరకు వైసీపీ సహా పలు రాజకీయ పార్టీలతో తెరవెనుక మంతనాలు జరుపుతున్నారట మజ్లిస్ అధినేత. అంటే, ఏపీలో కూడా మజ్లిస్ తనదైన ‘మైనార్టీ’ రాజకీయం చేయబోతోందన్నమాట.