తిరుపతి ఉప ఎన్నిక ప్రచారానికి జగన్.. కారణం అదేనా.?

తిరుపతి ఉప ఎన్నిక ప్రచారం కోసం వైఎస్సార్ కాంగ్రెస్ పార్టీ అధినేత, ఆంధ్రపదేశ్ ముఖ్యమంత్రి వైఎస్ జగన్ మోహన్ రెడ్డి వెళ్ళబోతున్నారు. ఇందుకోసం పార్టీ రూట్ మ్యాప్ కూడా సిద్ధమవుతోందట. సిట్టింగ్ స్థానాన్ని నిలబెట్టుకోవడం వైసీపీకి పెద్ద కష్టమేమీ కాదు. కానీ, అనూహ్యంగా తిరుపతి లోక్ సభ నియోజకవర్గ పరిధిలో రాజకీయ సమీకరణాలు మారాయని వైసీపీ అధిష్టానానికి సమాచారం అందడంతోనే, స్వయంగా ముఖ్యమంత్రి రంగంలోకి దిగుతున్నారనే ప్రచారం జరుగుతోంది. వైసీపీ తరఫున వైఎస్ జగన్, తనకు ప్రజా సంకల్ప యాత్రలో వైద్య సేవలు అందించిన ఫిజియోథెరపిస్ట్ గురుమూర్తికి తిరుపతి ఉప ఎన్నిక వైసీపీ టిక్కెట్ ఇచ్చిన విషయం విదితమే.

అయితే, పోటీలో వున్న మిగతా అభ్యర్థులతో పోల్చితే గురుమూర్తికి పెద్దగా వాక్చాతుర్యం లేదు. అస్సలాయన ఏమీ మాట్లాడలేకపోతున్నారన్న విమర్శ కూడా వినిపిస్తోంది. వైసీపీకి వున్న ప్రజాదరణే గురుమూర్తిని గెలిపిస్తుందని ఆ పార్టీ శ్రేణులు భావిస్తున్నా, ‘అభ్యర్థి ఎవరు.?’ అని ఎన్నికల ప్రచారంలో వైసీపీ నేతలకు ప్రశ్న ఎదురవుతుండడంతో, వైఎస్ జగన్ రంగంలోకి దిగి.. జోష్ పెంచాలనుకుంటున్నారన్నది రాజకీయ వర్గాల్లో విన్పిస్తోన్న వాదనల సారాంశం. మరోపక్క, తిరుపతిలో వైసీపీ గెలుపుపై టీడీపీ అనుకూల మీడియాకి కూడా పెద్దగా అనుమానాల్లేవు. ‘మెజార్టీ తగ్గుతుందేమోనన్న ఆలోచనతోనే వైసీపీ అధినేత రంగంలోకి దిగుతున్నారు..’ అంటూ టీడీపీ అను‘కుల’ మీడియా వ్యాఖ్యానిస్తుండడం కొత్త అనుమానాలకు తెరలేపుతోంది.

టీడీపీ అభ్యర్థి పనబాక లక్ష్మి జోరుగా ప్రచారం చేస్తున్న ఆమెకు టీడీపీ అను‘కుల’ మీడియా నుంచి అంతగా ప్రచారం లభించడంలేదు. మరోపక్క బీజేపీ – జనసేన ఉమ్మడి అభ్యర్థి రత్నప్రభ.. ప్రచారంలో హోరెత్తిస్తున్నప్పటికీ, ఆ రెండు పార్టీలు ఎంతమేర ఓటర్లను ప్రభావితం చేయగలవన్నది ప్రస్తుతానికి మిలియన్ డాలర్ల ప్రశ్నే. చిత్రమేంటంటే, బీజేపీని విమర్శించేందుకు అటు వైసీపీ, ఇటు టీడీపీ.. మీన మేషాల్లెక్కడుతుండడం. వైసీపీ, జనసేన అలాగే టీడీపీని విమర్శిస్తోంది. టీడీపీ అయితే, వైసీపీని విమర్శించడంలో షరామామూలుగానే అత్యుత్సాహం చూపుతోంది. ఇవన్నీ జనసేన బలపరిచిన బీజేపీ అభ్యర్థి రత్నప్రభకు అడ్వాంటేజ్ అవుతాయా.? అన్నది వేచి చూడాల్సిందే.