ఏమిటీ వైపరీత్యం: ప్రత్యేక హోదా కోసం వైసీపీ పోరాటమా.?

ఆంధ్రప్రదేశ్ రాష్ట్రానికి ప్రత్యేక హోదా ఇవ్వాల్సిందేనంటూ వైఎస్సార్ కాంగ్రెస్ పార్టీ పోరుబాట పట్టింది. అదేంటీ, వైసీపీ.. ఇప్పుడు అధికారంలోనే వుంది కదా.? ప్రత్యేక హోదా ఉద్యమాన్ని మర్చిపోయి దాదాపు రెండేళ్ళయ్యింది కదా.? మళ్ళీ ఇప్పుడెందుకు ప్రత్యేక హోదా కోసం వైసీపీ ఉద్యమిస్తోంది.? అన్న ప్రశ్నలు సర్వత్రా వినిపిస్తుండడం వింతేమీ కాదు.

కానీ, అధికార పార్టీలోనే కొంత ఆశ్చర్యం వ్యక్తమవుతోందట ఈ విషయమై. ‘అడుగుతూనే వుంటాం.. అంతకు మించి ఏం చేయగలం.?’ అంటూ పలు సందర్భాల్లో ముఖ్యమంత్రి వైఎస్ జగన్ మోహన్ రెడ్డి చేతులెత్తేసిన వైనాన్ని చూశాం. కానీ, సీన్ మారింది. కేంద్రం మెడలు వంచేస్తాం.. అన్న స్థాయిలోనే ఇటీవల వైసీపీ జాతీయ ప్రధాన కార్యదర్శి, ఎంపీ (రాజ్యసభ) విజయసాయిరెడ్డి హంగామా చేశారు. అందుకు అనుగుణంగానే చట్ట సభల్లో (పార్లమెంటు) వైసీపీ సభ్యులు హంగామా షురూ చేశారు.

ఈ పనేదో గడచిన రెండేళ్ళలో చిత్తశుద్ధితో చేసి వుంటే, ఈపాటికి సీన్ ఇంకోలా వుండేది. ఎక్కడో ఏదో తేడా కొడుతోంది. బలమైన రాజకీయ ప్రయోజనాలు లేకుండా.. ఎవరో వెనకనుండి ప్రోత్సహించకుండా.. వైసీపీ ఈ స్థాయిలో ప్రత్యేక హోదా కోసం ఉద్యమించే పరిస్థితి వుండదు. కరోనా నేపథ్యంలో కేంద్రంలోని మోడీ సర్కార్ నానా తంటాలూ పడాల్సి వస్తోంది. స్వీయ తప్పిదాలతో మోడీ సర్కార్, ప్రజల నుంచి తీవ్ర వ్యతిరేకతని ఎదుర్కొంటోంది. పెట్రోధరల వాత, వ్యాక్సినేషన్ ప్రక్రియలో లోపాలు.. వెరసి, విపక్షాలకు సమాధానం చెప్పలేని స్థితిలో వుంది కేంద్రం.

ఇలాంటి పరిస్థితుల్లో అధికార బీజేపీని గట్టున పడేయాలంటే, ఓ నాటకీయ కార్యక్రమం అవసరం. అదే కార్యక్రమాన్ని బీజేపీ, తనకు తెరవెనుకాల వివిధ అంశాల్లో మద్దతిస్తోన్న వైసీపీ ద్వారా చేయిస్తోందా.? అన్న అనుమానాలు కలుగుతున్నాయి. వైసీపీ నిలదీస్తోందట.. అధికార పక్షం మిన్నకుండిపోతోందట.. ఇదీ వైసీపీ అనుకూల మీడియా వైసీపీ ప్రత్యేక హోదా పోరు గురించి అల్లుతున్న కథనాల సారాంశం.

చంద్రబాబు హయాంలో, వైసీపీ ఎంపీలు ప్రత్యేక హోదా కోసం రాజీనామాస్త్రాలు సంధించారు. అప్పుడే కేంద్రం దిగొచ్చింది లేదు. అసలు పట్టించుకున్నదీ లేదు. అలాంటిది, ఇప్పుడు వైసీపీ ఎంపీలు పోరాటం చేస్తే ఉపయోగం ఏమన్నా వుంటుందా.? ఛాన్సే లేదు. ఆ విషయం వైసీపీకి కూడా తెలుసు. ప్రత్యేక హోదా ముసుగులో వైసీపీ చేస్తున్నది పోరాటం కానే కాదు.. మోడీ సర్కారుపై విపక్షాల దాడి వ్యవహారాన్ని డైల్యూట్ చేయడానికి.. అంటే డైవర్షన్ పాలిటిక్స్‌లో భాగంగానే వైసీపీ ఇదంతా చేస్తోందన్నమాట.