భువనగిరి ఎంపీ కోమటిరెడ్డి వెంకటరెడ్డి మోదీని దాని కోసమే కలిశారా..!!

ప్రధాన మంత్రి నరేంద్ర మోదీతో భువనగిరి ఎంపీ కోమటిరెడ్డి వెంకటరెడ్డి మంగళవారం భేటీ అయ్యారు. ఇప్పుడు వీరి సమావేశంకు ప్రాధాన్యత సంతరించుకుంది. ఒక కాంగ్రెస్ ఎంపీ బీజేపీ పార్టీ అధినేత మోదీతో భేటీ అవ్వటం రాజకీయాలలో ముఖ్యమైన విషయమే కదా మరి.

కోమటిరెడ్డి వెంకటరెడ్డి మోదీతో ప్రధానంగా నాలుగు అంశాలను వివరించినట్లుగా సమావేశం అనంతరం వెల్లడించారు. ఈ మేరకు అంశాల గురించి మోదీకి వినతి పత్రాలు ఇచ్చినట్లుగా కూడా చెప్పారు. ఆయన మీడియాతో మాట్లాడుతూ.. తెలంగాణ రాష్ట్ర ప్రభుత్వం హైదరాబాద్‌ లో ఏర్పాటు చేస్తున్న ఫార్మా సిటీకి పర్యావరణ అనుమతులు నిలిపివేయాలని కోమటిరెడ్డి ప్రధానిని కోరినట్లుగా తెలిపారు.

హైదరాబాద్ లో ఏర్పాటు చేస్తామన్న ఫార్మా సిటీని మొదటగా 3 వేల ఏకరాల్లో ఏర్పాటు చేస్తారని చెప్పి.. ఇప్పుడు 3 వేల ఎకరాల నుంచి 19,333 ఎకరాలకు పెంచారని, దాని వల్ల హైదరాబాద్ నగరం పై కాలుష్య ప్రభావం తీవ్ర స్థాయిలో ఉంటుందని కోమటిరెడ్డి వెంకటరెడ్డి మోదీతో చెప్పారు.

అలాగే.. హైదరాబాద్ ఔటర్ రింగ్ రోడ్డు నుంచి కొత్త గూడెం వరకు జాతీయ రహదారిని ఏర్పాటు చేయాలని, దీనికి నంబరు కూడా కేటాయించాలని కోరినట్లు చెప్పారు. హైదరాబాద్‌ లోని మూసీనది శుద్ధి కోసం రూ.3 వేల కోట్లు కేటాయించాలని, ఆ నీటిని శుద్ధి చేయటానికి శుద్ధి ప్లాంటును కూడా ఏర్పాటు చేసేలా చూడాలని ప్రధానిని కోరినట్లు చెప్పారు. గంగా నది ప్రక్షాళన కోసం కేంద్రం చేపట్టిన ‘నమామి గంగే’ కార్యక్రమం తరహాలో మూసీ నదిని కూడా ప్రక్షాళన చేయించాలని మోదీకి సూచించానన్నారు.

భువనగిరి నియోజకవర్గంలో.. నేషనల్ హ్యాండ్లూమ్ డెవలప్‌ మెంట్ కార్యక్రమంలో భాగంగా రూ.1,045 కోట్లతో బ్లాక్‌ స్థాయి చేనేత క్లస్టర్లు ఏర్పాటు చేయాలని కోరినట్లు వెంకటరెడ్డి తెలిపారు. హౌసింగ్ పథకాన్ని కేంద్రమే చేపట్టాలని ప్రధానిని కోరినట్టు ఎంపీ అన్నారు. తాను చేసిన అన్ని విజ్ఞప్తులకు ప్రధాని సానుకూలంగా స్పందించారని కోమటిరెడ్డి అన్నారు.