చంద్రబాబుతో మోహన్‌బాబు భేటీ.. అసలేంటి కథ.?

జనాన్ని వెర్రి వెంగళప్పల్ని చేయడానికి.. అన్నట్టు, 2019 ఎన్నికల సమయంలో సినీ నటుడు మోహన్‌బాబు చేసిన పబ్లిసిటీ స్టంట్లు అన్నీ ఇన్నీ కావు. విద్యార్థులతో కలిసి తన విద్యా సంస్థ యెదుట చేసిన ఆందోళనలు, ఆ తర్వాత వైఎస్సార్ కాంగ్రెష్ పార్టీలో ఆయన చేరడం, ఎన్నికల ప్రచారం చేయడం.. ఇదంతా అందరికీ తెలిసిన విషయమే.

అప్పట్లో అంతలా చంద్రబాబుని తిట్టిన మోహన్‌బాబు, ఇప్పుడు అదే చంద్రబాబు ఇంటికి వెళ్ళి గంటన్నరపాటు రాజకీయ మంతనాలు జరిపారట. అబ్బే, అవి రాజకీయ మంతనాలు కావు, సాయిబాబా గుడి వ్యవహారమంటూ ‘మంచు’ కాంపౌండ్ నుంచి ఓ వివరణ వస్తోంది.

రాజకీయాల్లో విమర్శలు సహజాతి సహజం. కడుపులో కత్తులు పెట్టుకుని కౌగలించుకోవడం, గోడ మీద పిల్లి వాటి.. పూటకో పార్టీ మార్చడం.. ఇలాంటివన్నీ మామూలే. ఒక్క మోహన్‌బాబునే ఈ విషయంలో విమర్శించడం సబబు కాదు. అప్పుడు తిట్టారు, ఇకపై పొగుడుతారేమో.! అప్పట్లో వైసీపీ తరఫున ప్రచారం చేశారు, ఇకపై టీడీపీ తరఫున ప్రచారం చేస్తారేమో.!

సినిమాల్లో నటించినందుకు పేమెంట్లు వస్తాయ్.. రాజకీయాల్లో ఎన్నికల ప్రచారం వేళ నటిస్తే పేమెంట్లతోపాటు పదవులు కూడా వస్తాయంటారు. మోహన్‌బాబు కూడా అదే బాపతా.? అంటే, అది మళ్ళీ వేరే చర్చ. కానీ, ‘ముక్కుసూటితనం’ అని చెబుతుంటారు మోహన్‌బాబు. చంద్రబాబు తనకు ద్రోహం చేశారనీ చెబుతారాయన. అలాంటి మోహన్‌బాబు, తన కుమార్తెను వెంటేసుకుని చంద్రబాబుని కలిశారన్న వార్త సహజంగానే రాజకీయాల్లో హాట్ టాపిక్ అవుతుంటుంది.

మెగాస్టార్ చిరంజీవికి, అటు ప్రధాని నరేంద్ర మోడీ, ఇటు ఆంధ్రప్రదేశ్ ముఖ్యమంత్రి వైఎస్ జగన్ మోహన్ రెడ్డి అమితమైన ప్రాధాన్యతనివ్వడం జీర్ణించుకోలేక మోహన్‌బాబు, తన పాత మిత్రుడు చంద్రబాబు పంచన చేరబోతున్నారన్నది ఓ ప్రచారం. ఇది నిజమేనా.? అంటే, దానికి మంచు కాంపౌండ్ నుంచి వివరణ రావాల్సి వుంది.

కుమార్తెను రాజకీయాల్లోకి తీసుకురావాలని మోహణ్‌బాబు అనుకుంటున్నారు.. కుమారుడ్ని రాజకీయాల్లోకి తెస్తారట.. ఇలా ఎన్నెన్నో ఊహాగానాలు. వీటిల్లో ఎంత నిజం వుందో ఏమో.!