బెడ్రూమ్‌లోకీ దూరిన మీడియా: రవిప్రకాష్‌ పుణ్యమే.!

తెలుగు టీవీ న్యూస్‌ ఛానల్స్‌ రంగంలో టీవీ9 ఓ సంచలనం. ఇందులో ఎవరికీ ఎలాంటి సందేహాలు అవసరం లేదు. కానీ, ఆ టీవీ9 పేరు చెబితేనే ‘జుగుప్స’ కలిగేలా చాలా సందర్భాల్లో ఆ మీడియా ప్రతినిథులు వ్యవహరించారనడానికి చాలా ఉదంతాలే సాక్ష్యంగా కన్పిస్తాయి. ఎక్కడన్నా ఏదన్నా ఘటన జరిగితే, అది గనుక ఎక్కువ టీఆర్పీ రేటింగుల్ని సాధించే సత్తా వున్నదైతే, ఇక ముందూ వెనుకా ఆలోచించే ప్రసక్తే లేదు. ‘మేం మీడియా, మేం ఎక్కడికైనా వెళ్తాం, ఎవరి బెడ్రూమ్‌లోకి అయినా తొంగి చూస్తాం’ అన్నట్లుగా ఓ కొత్త తరహా జర్నలిజం పుట్టుకొచ్చింది.. దానికి రవిప్రకాష్‌ నేతృత్వంలోని ఓ బృందమే శ్రీకారం చుట్టింది.

టీవీ9 అనే సంస్థకు సంబంధించిన అంతర్గత వ్యవహారాలతో మామూలుగా అయితే ప్రజలకు పెద్దగా సంబంధం లేదు. యాజమాన్యం మారడం, అంతర్గతంగా గొడవలు ఇవన్నీ జనం చర్చించుకునే అంశాలే కావు. కానీ, రవిప్రకాష్‌ విషయంలో ఎందుకు ఇంత చర్చ జరుగుతోందంటే, టీవీ9 పేరుతో ఆయన మీడియా రంగంలోకి తీసుకొచ్చిన సరికొత్త జర్నలిజం, దాని కారణంగా ప్రభావితమైన కొందరు వ్యక్తులు, టీఆర్పీ రేటింగుల కోసం టీవీ9 పడ్డ పాట్లు, వాటిని చూసి జనం నవ్వుకున్న వైనం, చీదరించుకున్న పరిస్థితులు.. ఇవన్నీ ఇప్పుడు రవిప్రకాష్‌ గురించి చర్చించుకునేలా చేస్తున్నాయి.

రవిప్రకాష్‌ పరారీలో వున్నాడన్న వార్తలొచ్చాక, ఆయన తన ఛానల్‌లో ప్రత్యక్షమయ్యారు. వివరణ ఇచ్చి సరిపెట్టకుండా, నైతిక విలువల గురించి మాట్లాడాడు. విలువల వలువలూడ్చేసి జర్నలిజం చేసిన ఆయన, ఆ జర్నలిజంలో విలువల గురించి మాట్లాడుతోంటే, బీభత్సమైన కామెడీ స్కీట్‌లా చాలామందికి అనిపించింది. నిజం చెప్పులు వేసుకునేలోపు, అబద్ధం ప్రపంచమంతా చుట్టేస్తుందట. ఈ విషయాన్ని ఆయనే చెప్పారు. ఇది నిజ్జంగా నిజం. అది నిజమని ఎన్నోసార్లు టీవీ9 నిరూపించింది. న్యూస్‌ ఛానళ్ళ రంగంలో గాసిప్స్‌ని పాపులర్‌ చేసింది టీవీ9 అని అందరికీ తెలుసు.

సీనియర్‌ కమెడియన్‌ మల్లికార్జునరావు (బట్టల సత్తిగాడుగా తెలుగు ప్రేక్షకులకు పాపులర్‌) అనారోగ్యం పాలైతే, ఆయన చనిపోయాడంటూ బ్రేకింగ్‌ న్యూస్‌లు ఇచ్చింది టీవీ9. ఆయన ఆ తర్వాత ఎంత మానసిక క్షోభ అనుభవించి వుంటాడు, ఆయన కుటుంబ సభ్యులు ఎంత బాధపడి వుంటారు? ఇది జరిగిన కొద్ది రోజులకే ఆయన దురదృష్టవశాత్తూ తుది శ్వాస విడిచారు. తీవ్ర అనారోగ్యానికి గురైతే, కన్ఫర్మేషన్‌ చేసుకోకుండా ‘మృతి’ వార్త ఎలా ప్రసారం చేస్తారో రవిప్రకాష్‌ సమాధానం చెప్పాలి. దీన్నే, అబద్ధం ప్రపంచం చుట్టి వచ్చేయడమంటారు రవిప్రకాష్‌గారూ!

సినీ తారల మీద గాసిప్స్‌ కావొచ్చు. అక్రమ సంబంధాల వ్యవహారాలు కావొచ్చు, రియల్‌ లైఫ్‌లో జరిగే క్రైమ్‌ సంబంధిత వార్తలు కావొచ్చు, మసాలా దట్టించి.. లేనివి వున్నట్లు, వున్నవి లేనట్టు ఇలా జర్నలిజం విలువల్ని పూర్తిస్థాయిలో దిగజార్చేసిన ఘనుడిగా రవిప్రకాష్‌కి మెరుగైన ట్రాక్‌ రికార్డ్‌ వుందన్నది మీడియాలో అందరికీ తెలిసిన సంగతే. నిజంగానే టీవీ9 మెరుగైన సమాజం కోసం పాటుపడుతున్నదే అయితే, సంస్థలో అంతర్గత కుమ్ములాటల్ని బయటపెట్టాలి. రవిప్రకాష్‌ మీద వస్తున్న ఆరోపణలపై విచారణ జరుగుతున్న తీరుకు సంబంధించి బాధ్యత గల మీడియా ఛానల్‌గా ‘పోస్ట్‌ మార్టమ్‌’ చేయాలి. చేయగలదా? రవిప్రకాష్‌ చేయనిస్తాడా?